შემოდგომის ერთა თასის დაწყებამდე ლევან მაისაშვილი პირობას დებდა, ყოველ მომდევნო მატჩში უკეთ და უკეთ ვითამაშებთო და ბორჯღალოსნების მთავარმა მწვრთნელმა სიტყვა უკვე შეასრულა. რომ შევადაროთ საქართველოს ნაკრები ოქტომბრის ბოლოს შოტლანდიელებთან მატჩში და ის გუნდი, რომელმაც 29 ნოემბერს დუბლინის „ავივა სთედიუმზე“ ირლანდიის ეროვნული გუნდის წინააღმდეგ ითამაშა, ცხადია, რომ ბორჯღალოსნებმა უდიდესი პროგრესი განიცადეს.
23:10 – ასეთია ირლანდიელთა და ქართველთა რიგით მეხუთე შეხვედრის საბოლოო ანგარიში. დებიუტში „სამყურების“ უპირატესობა უდიდესი იყო და ისინი ჯერ ლელო-გარდასახვით 7:0 დაწინაურდნენ, მერე ჯარიმაც გაიტანეს და თითქოსდა, ის უნდა განმეორებულიყო, რაც ქართველებს ჯერ ინგლისთან (0:40) შეემთხვათ, შემდეგ კი – უელსთან (0:18). მაგრამ საბედნიეროდ, ამ ჯერზე ქართველთა უტეხ მებრძოლ ხასიათს სათამაშო მომზადება და ოსტატობაც კი უმაგრებდა ზურგს. ჩვენი ბიჭები უფრო თავდაჯერებულები ჩანდნენ და სულ მალე შუამარბმა გიორგი კვესელაძემ ხასიათიც, მომზადებაც და ოსტატობაც ერთიანად გამოავლინა – ძალისმიერი და სწრაფი გარღვევით ულამაზესი ლელო გაიტანა! 7:10 – ეს უკვე თანაბარ ბრძოლას ნიშნავდა! ირლანდიელები ამ ლელომ დააფრთხო, ისინი ნებისმიერი ხელსაყრელი პოზიციიდან კარში ურტყამდნენ და არ ამწვავებდნენ თამაშს.
ტაიმი მასპინძლებმა 13:7 მოიგეს, მეორე ნახევრის დასაწყისში კი ჩვენმა შერკინებამ თავისი ძველი დიდება გაიხსენა და მეტოქის წალეკვით ჯარიმა მოინადირა, რომელიც თედო აბჟანდაძემ მორიგ 3 ქულად აქცია – 10:13.
5 დეკემბერს, სავარაუდოდ, ფიჯელებს დავუპირისპირდებით, რადგან ამ გუნდის მესვეურები აცხადებენ, რომ მათი მორაგბეები კორონავირუსისგან განიკურნენ და საქართველოსთან სათამაშოდ ემზადებიან. ყველაფერი კვირის დასაწყისში გაირკვევა.
