25 წლის გერმანელი ნახევარმცველი იულიან ვეიგლი „ბენფიკადან” გაქცევას აპირებს.
აგვისტოსდან ლისაბონის კლუბს 66 წლის ჟორჟე ჟესუსი უდგას სათავეში. მის ხელში ვეიგლმა სულ 6 შეხვედრაში მიიღო მონაწილეობა, რომელთაგან ერთადერთხელ დაჰყო მოედანზე 90 წუთი.
სააგენტო Sports eXcellence-მა, რომელთანაც ფეხბურთელს კონტრაქტი აკავშირებდა, მას პორტუგალიის დედაქალაქში დარჩენა ურჩია. ეს ყოფილი დორტმუნდელისთვის მიუღებელი აღმოჩნდა, რის გამოც Sports eXcellence-ს გაექცა და ახალ „პატრონს”, 77 წლის პინი ზაჰავის მიეკედლა.
ზაჰავი ფეხბურთელებით ვაჭრობაში საქვეყნოდ ცნობილი კაცია, რომლის კლიენტთა შორის არიან „ბაიერნის” ვარსკვლვები რობერტ ლევანდოვსკი და დავიდ ალაბა. ის იულიან ვეიგლისთვის ახალ კლუბს ეძებს.
ვეიგლი „ბენფიკაში” 2020 წლის იანვარში გადავიდა. ლისაბონელებმა მასში 20 მილიონი ევრო გადაიხადეს. კონტრაქტის თანახმად, გერმანელი „ესტადიო და ლუჟზე” 2024 წლამდე უნდა დარჩეს, თუმცა, როგორც ავღნიშნეთ, ეს კონტრაქტი, ალბათ, დიდხანს აღარ გაგრძელდება.
როდესაც ვეიგლი „ბენფიკამ” იყიდა, გუნდს 44 წლის ბრუნო ლაჟე წვრთნიდა. მისი ხელმძღვანელობით, გერმანიის ნაკრებში ხუთჯერ ნათამაშევი ფეხბურთელი რეგულარულად ხვდებოდა ძირითად შემადგენლობაში.
„ჩემოდანი ჩალაგებული მაქვს. ვიცი, რომ ბევრი მაკრიტიკებს. მე არ გახლავართ ის ფეხბურთელი, რომელიც მოედანზე ტრიუკებს აკეთებს და ყვირის. ჩამშლელი ნახევარმცველი ვარ და ჩემი გამოყენება სხვანაირად არის საჭირო. ჯერჯერობით, არავინ შემხმიანებია”, უთხრა ვეიგლმა „შპორტბილდს”.
