დიდი შანსია ინგლისის ნაკრებმა ერთა ლიგის შეხვედრა ისლანდიის წინააღმდეგ ათასობით კილომეტრის მოშორებით, ალბანეთში ითამაშოს.
ეს, კლუბებსა და ნაკრებს შორის ახალ დაპირისპირებებს გამოიწვევს.
თუ ინგლისელები შემდეგ ოთხშაბათს ბალკანეთში გაემგზავრებიან, სამშობლოში ხუთშაბათს გამთენიამდე ვერ დაბრუნდებიან, შაბათს კი უკვე პრემიერლიგის თამაშებია.
ეს დიდი დარტყმა იქნება ფრენკ ლემპარდისთვის, რომლის „ჩელსიც” სანაკრებო პაუზის შემდეგ ნიუკასლს მიემგზავრება, სადაც მატჩი, როგორც ინგლისელები წერენ, ლანჩის დროს არის დანიშნული — იქაურად 12:30-ზე, რაც ჩვენებურად 16:30 გახლავთ.
„ჩელსის” ნაკრებში რიის ჯეიმსი, მეისონ მაუნტი და ტამი აბრაჰამი ჰყავს მივლინებული.
როგორც ადრინდელ სტატიებში მოგახსენეთ, ისლანდიის ნაკრებს ლონდონში ჩასვლის პრობლემა აქვს. მიზეზი: covid 19-ის პანდემიასთან დაკავშირებით, ბრიტანეთის ხელისუფლების ახალი რეგულაციების თანახმად, დანიიდან მათ ქვეყანაში შესვლა შეიზღუდა. ისლანდიას კი კვირას კოპენჰაგენში აქვს თამაში.
იმავე დღეს ინგლისი სტუმრად უნდა შეხვდეს ბელგიელებს.
ინგლისის ფეხბურთის ასოციაცია ცდილობს მთავრობას მოელაპარაკოს და ისლანდიელი ფეხბურთელებისთვის გამონაკლისი დააშვებინოს, მაგრამ, ჯერჯერობით მთავრობა უარზეა.
ამ საგიჟეთში ინიციატივა გამოიჩინა ალბანეთის ფეხბურთის ასოციაციამ, რომელმაც მხარეებს ტირანაში თამაში შესთავაზა. ცნობისთვის: ლონდონსა და ტირანას შორის ჰაერით 1892, ხოლო ხმელეთით 2479 კილომეტრია.
კორონაპანდემიის პერიოდში, შეხვედრების მასპინძლობა უეფას ადრე კვიპროსმა, საბერძნეთმა, უნგრეთმა და პოლონეთმაც შესთავაზეს.
ინგლისის ნაკრებს ხუთშაბათს, 12 ნოემბერს, „უემბლიზე” ირლანდიასთან ელის ამხანაგური შეხვედრა.
