ფრანგული „პარი სენ-ჟერმენის“ თავდამსხმელი კილიან მბაპე კლუბთან ახალი და ხანგრძლივი კონტრაქტის გაგრძელებაზე არ ფიქრობს.
მოქმედი ხელშეკრულებით 21 წლის ფეხბურთელს პარიზელებთან ურთიერთობა 2022 წლამდე აკავშირებს. კლუბში კი ფიქრობენ, რომ ეს საკმარისი არ არის და გაგრძელებას სთავაზობენ. პრობლემად რჩება თავად მბაპეს პოზიცია, რომელიც ფიქრობს, თუ ხელშეკრულებას გააგრძელებს, მომავალში გუნდის შესაძლო გამოცვლა გაუჭირდება.
შეგახსენებთ, რომ მბაპე პსჟ-ში 2017 წლის ზაფხულს „მონაკოდან“ გადავიდა. თავდაპირველად ეს იჯარის წესით მოხდა, მაგრამ გამოსყიდვის უფლებით. პარიზელებმაც ეს ოფცია გამოიყენეს და ახლა მათი სრულფასოვანი წევრია. მისი გამოსასყიდი ფასი 180 მილიონი ევროა.
მბაპე საფრანგეთის ნაკრებშიც 2017 წლიდან არის და 2018 -ში მსოფლიო ჩემპიონის ტიტულიც მოიგო.
