„ბარსელონას” ყოფილი თავდამსხმელის ჩოკო ლოსანოს გოლი ერთადერთი აღმოჩნდა „რეალისა” და „კადისის” შეხვედრაში — მადრიდელებმა შინ წააგეს.
საგოლე პასი ლოსანოს თავით ვეტერანმა ალვარო ნეგრედომ დაუგდო. ნეგრედოს სასახელოდ უნდა ითქვას, რომ 35 წლის მიუხედავად, ჩინებულად ითამაშა და ესპანეთის ჩემპიონს ბევრი პრობლემა შეუქმნა: მისი დარტყმული ჯერ სერხიო რამოსმა გამოიტანა კარის ხაზიდან, შემდეგ კი თავით ცოტათი ააცილა მიზანს.
„კადისი” შესვენებაზე მხოლოდ ერთგოლიანი უპირატესობით სავარაუდოდ უკმაყოფილო გავიდა. და არც ის იქნება გადაჭარბება, თუ ვიტყვით, რომ ზინედინ ზიდანი თავისი ქვეშევრდომების ასეთმა თამაშმა გააბრაზა — შესვენებისას ოთხი(!) ფეხბურთელი შეცვალა.
როგორც გაირკვა, „თეთრებს” ვერც ამ ოთხკაცა ცვლილებამ უშველა. მათი თამაში შესვენების შემდეგაც უხარისხო იყო.
ბოლოს, ტონი კროოსის ნაცვლად მოედანზე ლუკა იოვიჩი შევიდა და გოლიც შეაგდო, მაგრამ არ ჩაუთვალეს — საგოლე პასი ქარიმ ბენზემამ ოფსაიდიდან ჩააწოდა. ცოტა ხანში, საჯარიმოს მისადგომებიდან თავად ბენზემამ გაარტყა ხარიხას.
ეს გახლდათ „რეალის” პირველი მარცხი ახალ ჩემპიონატში. მადრიდელებს 10 ქულა აქვთ, იმდენივე რამდენიც „კადისს”, „გრანადასა” და „ხეტაფეს”. „ბარსელონას” ცხრილში თამაშით ნაკლები და 7 ქულა უწერია.
შემდეგ ტურში, „კამპ ნოუზე” „ელ კლასიკოა”.
