არსენ ვენგერმა, რომელიც ინგლისში თითქოს მივიწყებული იყო, მაგრამ ბოლოხანს კვლავ გამოჩნდა საინფორმაციო საშუალებებში, თქვა, რომ მისი დაპირისპირება კოლეგებთან, ალექს ფერგიუსონსა და ჟოზე მოურინიუსთან ხშირად ზღვარს სცდებოდა.
მოგეხსენებათ, ფრანგი 22 წლის განმავლობაში „არსენალს” ედგა სათავეში. 1996 წელს, მისმა ინგლისში გამოჩენამ პირველი „მანჩესტერ იუნაიტედის” ლეგენდარული მწვრთნელი სერ ალექს ფერგიუსონი გააღიზიანა.
ვენგერი: „ჩემი და ალექსის მეტოქეობა?.. მე გახლდით უცხოელი, რომელიც ინგლისში ჩამოვედი და მის ბატონობას შევეხე. ამან ის გააღიზიანა. წაგება მასაც სძულდა და მეც, ამიტომაც, ხანდახან, ჩვენი დაპირისპირება ზღვარს სცდებოდა, მაგრამ, როდესაც შეჯიბრება სრულდებოდა, ჩვენს შორის ურთიერთობა შედარებით თბებოდა.
დღეს, ჩვენს შორის მშვიდობიანი, მეგობრული დამოკიდებულებაა”.
აი, რაც შეეხება ვენგერსა და ჟოზე მოურინიუს, მათ ურთიერთობას მეგობრული ნამდვილად არ ერქვა. ამპარტავანი პორტუგალიელი „ჩელსიში” 2004 წელს ჩავიდა და მალევე გამოაცხადა, „განსაკუთრებული” ვარო.
შემდეგ, მოურინიუმ ერთხანს ინგლისს გარეთ იმუშავა, მაგრამ რამდენიმე წელიწადში კვლავ „ჩელსიში”, შემდეგ კი „მანჩესტერ იუნაიტედში” დაბრუნდა და ვენგერთან ამ პერიოდშიც ბევრჯერ წაკინკლავდა.
პორტუგალიელმა ვენგერს ერთხელ „ჩაფლავებათა სპეციალისტი” უწოდა.
70 წლის ვენგერი ამბობს: „დაპირისპირება ხანდახან მეტისმეტად პიროვნული ხდებოდა და ზღვარს გადადიოდა. პრობლემაა, როდესაც მოედანზე გადიხარ და თავიდანვე ბრაზობ, რადგან მანამდე, პრეს-კონფერენციაზე ავი სტყვები ითქვა. შენ გძულს კაცი რომელიც გადაღმა მხარეს დგას და თავს იკავებ, მაგრამ ხანდახან თავის შეკავება ძალიან ძნელია”.
