გოგა ბითაძემ NBA-ში ერთი სეზონი უკვე გაატარა. „ინდიანა პეისერსის“ ქართველმა ცენტრმა რეგულარული სეზონის 54 მატჩი ჩაატარა. მისი საშუალო მაჩვენებელი 3.2 ქულა და 2.0 მოხსნაა. მართალია, ფლეი ოფში არ უთამაშია, მაგრამ საერთო ჯამში…
„კმაყოფილი ვერ ვიქნები მხოლოდ სათამაშო დროით, მაგრამ ვითამაშე NBA-ში, მქონდა ვარჯიშები, ვნახე ფლეი ოფის მატჩები, გავიგე რა ხდება ამერიკულ კალათბურთში და მივიღე დიდი გამოცდილება. შევეჩვიე განსხვავებულ კალათბურთს, რომელიც ამერიკაშია. NBA-ში თამაში ყველა კალათბურთელის ოცნებაა, მე კი იქ ვარ – რაც ჩემთვის საამაყოა. ნეით მაკლმილანი ნამდვილად კარგი მწვრთნელი იყო. ერთია, ახალგაზრდა კალათბურთელებს რთულად ენდობა. ამაში საწყენი არაფერია, მისი გადასაწყვეტია ვის როგორ და რამდენ დროს მისცემს“, – გვითხრა გოგა ბითაძემ, რომელიც შვებულებას თბილისში ატარებს და მას სპორტის ახალ სასახლეში შევხვდით.
რას უნდა ველოდოთ მომავალ სეზონში ქართული კალათბურთის იმედისგან? ამასთან, ამერიკულ მედიაში ბევრი იწერება, რომ „ინდიანაში“ ბითაძის მთავარი კონკურენტი მაილს ტერნერი გუნდიდან მალე წავა.
„მომავალი სეზონი როგორი იქნება, ეგ ზუსტად არავინ იცის. გუნდში ახალი მწვრთნელი უნდა მოვიდეს და მისი გადასაწყვეტია რამდენს ვითამაშებ. მეც ვვარჯიშობ და ველოდები ახალ სეზონს. იმედი მაქვს ბევრად უკეთესი იქნება, ვიდრე პირველ წელს იყო – მეტი სათამაშო დრო და მეტი შესაძლებლობა. რაც შეეხება ტერნერს, მის წასვლაზე ჯერ ცნობილი არაფერია. მეც ინფორმაცია მხოლოდ მედიიდან მაქვს. ჯერ გადაწყვეტილი არაფერია. რა თქმა უნდა, მაილსისგან ბევრი ვისწავლე, კარგი ადამიანია, კარგი კალათბურთელი. დასამალი არაფერია, მისი წასვლით უფრო მეტი დრო მომეცემა, მეტი შანსი. ასე რომ, მისი წასვლა გუნდიდან ჩემთვის უფრო კარგი იქნება“, – იმედიანადაა ბითაძე.
გოგას ევროპულ და ამერიკულ კალათბურთს შორის სხვაობაზეც ვკითხეთ…
„განსხვავება, პირველ ყოვლისა, სისწრაფე და სივრცეების არსებობაა – NBA-ში უფრო მეტი სივრცეა. გუნდები ცდილობენ, ძალიან სწრაფად ითამაშონ. ევროპულ კალათბურთთან შედარებით, 3-წამიანში ყოფნა უფრო მცირე დროით შეიძლება, რაც მოედანზე სივრცეების არსებობას განაპირობებს.
და საქართველოს ნაკრები…
„მართალია ევროპის ჩემპიონატზე გასულები ვართ, მაგრამ ეს შესარჩევი თამაშები ახალგაზრდა კალათბურთელებს გარკვეულ გამოცდილებას შეგვძენს. პირველ ყოვლისა საკუთარ თავზე ვსაუბრობ. გუნდი უკეთ შეთამაშდება, გვყავს ისეთი კარგი მწვრთნელი, როგორიც ილიას ზუროსია. და, რაც მთავარია, მოვირგებთ ეროვნული გუნდის მაისურას. ჩვენ კი, ყველა მატჩში მოედანზე მოსაგებად გავალთ. ევრობასაკეტის ჯგუფი თბილისში რომ ტარდება, ეს ძალიან დიდი პლუსია. დარწმუნებული ვარ ქართველი ქომაგებით სავსე იქნება დარბაზი და ისე გვიქომაგებენ, როგორც ამას სხვა დროს აკეთებენ. ეს ჩვენთვის ძალიან დიდი მოტივაციაა. ჩვენც მოუთმენლად ველით ევრობასკეტს და გვსურს, რომ ქართველი ხალხი გავახაროთ.
