ესტონეთი-საქართველო. კიდევ ერთხელ, ჯამში მეშვიდედ. აქამდე ისე ხდებოდა, რომ ყველა დაპირისპირება ამხანაგური იყო, 5 სექტემბერს კი ერთა ლიგის ჯგუფური ეტაპი იწყება. შეხვედრა ტალინის „ლე კოქ არენაზე“ შედგება, უკვე ოფიციალურის სტატუსით…
უცნაურია: ექვსივე წინა მატჩში საქართველო სხვადასხვა მწვრთნელით იყო. ვლადიმერ გუცაევი, დავით ყიფიანი/რევაზ ძოძუაშვილი, პეტარ სეგრტი, თემურ ქეცბაია, კახა ცხადაძე, ვლადიმირ ვაისი. აქედან გუცაევის, ქეცბაიასა და ვაისის ხელში მოიგეს.
ურთიერთშეხვედრებში მცირე უპირატესობა საქართველოსია. 3 მოგება, 1 ფრე, 2 წაგება, ბურთებიც 8:7 საქართველოს სასარგებლოდ. ამ 8 გოლიდან განსაკუთრებით ლამაზი იყო ვაკო ყაზაიშვილის გატანილი ბოლო დაპირისპირებაში: დრიბლინგი და საჯარიმოს გარედან გარე ტერფით აჭრა.
პირველი შეხვედრა, 3:1 მოგება… გუცაევმა ბევრი დებიუტანტი ათამაშა, ფაქტიურად, მეორე შემადგენლობით იყო ნაკრები. სოსო გრიშიკაშვილი, გიორგი ბალაშვილი, ვაჟა თარხნიშვილი, გია ჩხაიძე, გიორგი რევაზიშვილი, კახა კვეტენაძე, დავით ჯანაშია და სხვები.
მტკივნეული იყო ხუთი წლის წინანდელი 0:3 სტუმრად. არადა, ეს მოხდა მას მერე, რაც გერმანიასთან ნაკრებმა ხარისხობრივად კარგი მატჩი ჩაატარა და დასანანად წააგო – 1:2. სიტყვა “ხარისხობრივად” გამოვყავით, რადგან წაგება არასოდეს არაა სასიამოვნო. ნაკრებს მაშინ ცხადაძე წვრთნიდა, თუმც გუნდიც შეთხელებული შეამადგენლობით იყო ტალინში ჩასული.
ახალგაზრდულ ასაკში სულ იჩაგრებოდნენ ბალტიისპირელები, ერთხელ საქართველოს 19-წლამდელთა ნაკრებმა ტალინში 8:1 მოიგო. ეს 2003 წელს. თუმცა ახალგაზრდული სხვაა, დღეს კი სხვა რანგის თამაში იქნება. საქართველოს კი აქვს დანაკლისი: ვაკო ყაზაიშვილი, გურამ კაშია, ოთარ კიტეიშვილი, ჯიმი ტაბიძე, ლაშა დვალი, გიორგი ნავალოვსკი…
განსაკუთრებით იგრძნობა მარცხენა მცველის პრობლემა. ერთბაშად მიეწყო მათი ტრავმები და შესაძლოა, ვაისმა დებიუტანტი დავით კობოური ათამაშოს. სხვა ნომინალური მარცხენა მცველი არავინაა. ჭირს ცენტრფორვარდის პოზიციაზეც, რადგან გიორგი ქვილითაია კარგა ხნის უთამაშებელია და ნიკა კაჭარავას „ანორთოსისსაც“ არ ჰქონია დატვირთვები.
მსაჯებზეც. ლიტველები განსჯიან. მთავარი არბიტრი იქნება დონატას რუმშასი.
