ერთა ლიგის შეხვედრის დამთავრების შემდეგ ესპანეთის ნაკრების მწვრთნელმა ლუის ენრიკემ, პრესკონფერენციაზე, ძირითადი ყურადღება მეკარეებზე გაამახვილა: შტუტგარტში, გერმანია ტიმო ვერნერის მიერ 51-ე წუთზე გატანილი გოლით „ლა როხას” 1:0-ს უგებდა, მაგრამ, როდესაც საქმე ყველას უკვე დამთავრებული ეგონა და 90+6(!) წუთი მიმდინარეობდა, ხოსე გაიამ ანგარიში გაქვითა.
სულ ცოტა ხნის წინ, „მანჩესტერ იუნაიტედის” ესპანელ მეკარეს დავიდ დე ხეას უხეში შეცდომების გამო ინგლისში დიდი რისხვა დაატყდა თავს, მაგრამ ლუის ენრიკე გერმანელებთან შეხვედრაში მას ენდო და როგორც გაირკვა სწორადაც მოიქცა — დე ხეამ რამდენიმე ეპიზოდში ბრწყინვალე თამაშით იხსნა გუნდი თითქოსდა გარდაუვალი გოლისგან.
„დე ხეამ ასე ინგლისშიც ბევრჯერ ითამაშა, — თქვა ესპანელთა თავკაცმა პრესკონფერენციაზე, — ჩვენ მას სულ ვაკვირდებით და ვხედავთ, რომ საკმარისია შეცდეს, ისევე როგორც ჩვენს მეორე გოლკიპერს კეპა არისაბალაგას იმწუთას კრიტიკის ქარ-ცეცხლში ატარებენ.
დღეს დე ხეამ ისე ითამაშა, რომ ერთადერთი, რაც შემიძლია ვთქვა ეს არის: ჩვენ დიდი მეკარე გვყავს. მე დე ხეასაც და კეპასაც სულ იმას მოვუწოდებ, რომ არ აღელდნენ, არ აჰყვნენ მათ გარშემო ატეხილ აჟიოტაჟს. ბოლო დროს ისინი პრესამ შავ დღეში ჩააგდო, ამიტომ, ამ ჯერზე მე ორივეს უფრო რბილად მოვექეცი, მაგრამ ფაქტი ერთია — დე ხეამ და კეპამ იციან, რომ მათ შეცდომებზე ერთ ამბავს ატეხენ, მათ წინ მდგომი ფეხბურთელების შეცდომებზე კი არა”.
შემდეგ ლუის ენრიკემ ზოგადად, თავისი გუნდის თამაში შეაფასა:
„რასაკვირველია, ჯერ კიდევ ბევრი რამ გვაქვს გამოსასწორებელი. ტაქტიკური თვალსაზრისით ძალიან კმაყოფილი ვარ. მნიშვნელობა არ აქვს, ვის და სად ვეთამაშებით. მეტოქეს ყოველთვის უნდა შევუტიოთ. ცენტრს გადაღმა თამაში სისხლში გვაქვს, მაგრამ დღეს ბურთი ბევრჯერ დავკარგეთ და ეს არ მომეწონა.
ახალწვეულების შესახებ კი იმას ვიტყვი, რომ ანსუ ფატის ომახიანი დებიუტი გამოუვიდა. ჩვენ გვყავს ფეხბურთელები, რომლებიც ნაკრებში პირველ ნაბიჯებს დგამენ და ამ მხრივ დღეს ყველაფერი კარგად იყო. ისინი მომავალში მეტს და მეტს ითამაშებენ. მათი მოწადინება ძალიან სასიამოვნო სანახავი იყო”.
რაც შეეხება გერმანიის ნაკრების მწვრთნელს იოაჰიმ ლიოვს, მისთვის მთავარი თემა კალენდარი იყო:
„როდესაც ბოლოწამს გაგითანაბრებენ, რასაკვირველია გაწბილდები, მაგრამ ჩემმა ბიჭებმა ძალა არ დაზოგეს, ბოლომდე ითამაშეს და ეს არის მთავარი. უბრალოდ, დღეს ისინი ისეთ ფორმაში ვერ იყვნენ, ოქტომბერში რომ იქნებიან. ფეხბურთელები შვებულებებიდან ახალი დაბრუნებულები არიან და პირდაპირ სანაკრებო თამაშებში მოუხდათ მონაწილეობა”.
