მადა ჭამაში მოდისო – ნათქვამია. ხომ გახსოვთ, რა ამბები იყო შარშან ნეიმარის პარიზულ კლუბში დარჩენა-არდარჩენის გამო. ბრაზილიელს ბარსელონაში დაბრუნება სურდა. მაგრამ გარიგება ვერ მოხერხდა.
მას შემდეგ ბევრი რამ შეიცვალა. პსჟ ჩემპიონთა ლიგის ფინალში გავიდა და ნეიმარსაც პარიზელებთან ერთად მოუნდა ამ ტურნირის მოგება. ამჯერად მან დაადასტურა, რომ მომავალ სეზონში ისევ პსჟ-ში ითამაშებს. მას პარი სენ-ჟერმენთან ერთად ჩემპიონთა ლიგის მოგება სურს.
„მომავალ სეზონში პსჟ-ში ვრჩები. იმ ამბიციით, რომ ამჯერად ჩემპიონთა ლიგას მოვიგებთ. მომწონს იდეა, ჩემი სახელი კლუბის ისტორიაში ჩავწერო. თუ აქამდე ადამიანებს ეჭვი ეპარებოდათ პსჟ-ის სიდიადეში, ლისაბონში ეს ეჭვები დასამარდა. ტურნირი თავაწეულებმა დავტოვეთ. გვჯერა, რომ ამ ტურნირის მოგება შეგვიძლია.“ – ციტირებს ბრაზილიელის სიტყვებს კლუბის პრესსამსახური.
