Mes que un club – მეტი ვიდრე კლუბი. ეს, მოგეხსენებათ, „ბარსელონას” ლოზუნგია და გუნდის ახალი მწვრთნელი, 57 წლის რონალდ კუმანი სწორედ ამ ლოზუნგის შესაბამისად აპირებს „კამპ ნოუზე” თავისი საქმიანობის გაშლას. მას ბევრი ფეხბურთელის გაყიდვა და შესაბამისად ბევრი ახლის მიყვანა აქვს გადაწყვეტილი, თუმცა ჰოლანდიელს სიაში ჰყავს ისეთებიც, რომლებიც მისი აზრით თავიანთ შესაძლებლობებს იმიტომ ვერ ამჟღავნებდნენ, რომ კიკე სეტიენი სწორად არ ათამაშებდა.
ჰოლანდიელის აზრით ერთ-ერთი ასეთი მოთამაშე არის 29 წლის ფრანგი ანტუან გრიზმანი. მის შესახებ საუბრისას კუმანმა გაზეთ NOS-ს უთხრა:
„ჩემი დიდი პატივისცემის მიუხედავად, მინდა ვთქვა, რომ გრიზმანი ტრადიციული გარემარბი არ არის. ამიტომ, ის მისთვის მოსახერხებელ პოზიციაზე უნდა ათამაშო. გრიზმანს ისეთი ფუნქციის შერჩევა სჭირდება, სადაც თავის შესაძლებლობებს მაქსიმალურად გამოამჟღავნებს”.
გრიზმანს „ბარსელონაში” პირველი სეზონი ჩაუვარდა. კიკე სეტიენი მას ხან ფრთაზე ათამაშებდა, ხანაც ამპლუას უცვლიდა, ხოლო მნიშვნელოვან შეხვედრებში სულაც სათადარიგოთა სკამზე ტოვებდა.
კუმანის აზრით სეტიენი ფრენკი დე იონგსაც არასწორად იყენებდა. „ბლაუგრანას” ახალმა მწვრთნელმა თქვა:
„თავიდან დაგეგმილი იყო, რომ დე იონგს „ბარსელონაშიც” იმავე პოზიციაზე გამოიყენებდნენ, რომელზეც ჩვენ ეროვნულ გუნდში ვათამაშებდით. არადა, შემდეგ, მახსოვს, „კამპ ნოუზე” მატჩს დავესწარი და ვნახე, რომ მას ისეთი დავალება ჰქონდა მიცემული, რომელსაც მე არავითარ შემთხვევაში არ მივცემდი. როდესაც ახალგაზრდა ფეხბურთელში უამრავ ფულს იხდი, ისე უნდა ათამაშო, რომ მისთვის მოსახერხებელი იყოს”.
