გადაწყვეტილი ამბავია – რონალდ კუმანი „ბარსელონას“ გაწვრთნის. 57 წლის სპეციალისტმა კონტრაქტს ხელი მოაწერა და კატალონიურ კლუბს 2022 წლის ზაფხულის ჩათვლით უთავკაცებს.
ახალი მწვრთნელის პრეზენტაცია დღეს შედგება და ყველა სამედიცინო რეკომენდაციების გათვალისწინებით ჩაივლის.
ფეხბურთელის რანგში კუმანმა „ბარსელონას“ მაისური 1989-95 წლების ჩათვლით მოირგო. 4-ჯერ გახდა ესპანეთის ჩემპიონი, 3-ჯერ – სუპერთასის, ხოლო თითოჯერ სამეფო თასი, ჩემპიონთა თასის და უეფას სუპერთასის გამარჯვებულია.
რაც შეეხება სამწვრთნელო კარიერას: კუმანს „ბარსელონაში“ უმუშავია ასისტენტის რანგში, დამოუკიდებლად კი 2000 წელს შეუდგა საქმეს და პირველი გუნდი „ვიტესი“ იყო, რასაც შემდეგ მოჰყვა „აიაქსი“, „ბენფიკა“, პსვ, „ვალენსია“, „ალკმაარი“, „ფეინოორდი“, „საუთჰემპტონი“ და „ევერტონი“. ბოლოს კი, ნიდერლანდების ნაკრების თავკაცი იყო.
