მიუნხენის „ბაიერნთან“ განცდილი გამანადგურებელი მარცხის შემდეგ, „ბარსელონას“ გულშემატკივრები უკმაყოფილებას ვეღარ მალავენ. ფანები სიუტატ ესპორტივას ტერიტორიაზე შეიკრიბნენ და კლუბის ფეხბურთელ-ხელმძღვანელობის წინააღმდეგ ბანერები გამოკიდეს.
„კლუბის 121 წლიანი ისტორიის შემარცხვენელი ფეხბურთელები და დირექტორთა საბჭო“, – ვკითხულობთ ერთერთ ბანერზე.
ამ ყველაფრის შემდეგ კი „ბარსელონამ“ დიდი ცვლილებები დაგეგმა. ესპანური მედიის ინფორმაციით, კლუბი იმდენი ფეხბურთელის გაშვებას განიხილავს, მათი ჩამოთვლა შორს წაგვიყვანს. თუმცა, მათ შორის არიან საკმაოდ „მძიმეწონოსანი“ ფიგურებიც – ლუის სუარესი, ხორდი ალბა და სერხიო ბუსკეტსი… ხელშეუხებელთა შორის არის: ლეო მესი, მარკ-ანდრე ტერ შტეგენი, ლენგლე და ფრენკი დე იონგი. ასევე არ განიხილება ახალგაზრდა ფეხბურთელების, ანსუ ფატისა და რიკი პუჩის გაყიდვა.
ფეხბურთელებზე ადრე კლუბს, სავარაუდოდ, მთავარი მწვრთნელი დატოვებს. მასთან ერთად პრეზიდენტი დირექტორების – ერიკ აბიდალისა და ოსკარ გრაუს გათავისუფლებას გეგმავს.
აი, უფრო მაღალი რანგის ხალხი კი, ჯერ წასვლაზე სულაც არ ფიქრობენ. საპრეზიდენტო არჩევნების ჩატარების სამი სავარაუდო თარიღი მოჩანს. გავრცელებული ხმებით, არჩევნები ნოემბერში, იანვარში ან მარტში ჩატარდება.
„ბარსელონას“ ყოფილი ვიცე-პრეზიდენტი, ემილი რუსო, კლუბში არსებულ ვითარებას ეხმაურება. იგი ვადამდელი საპრეზიდენტო არჩევნების დანიშნვას უჭერს მხარს. მისი თქმით, ვადამდელი არჩევნები უკვე უმრავლესობის მოთხოვნას წარმოადგენს და „ბარსელონაში“ ყველამ ერთად უნდა შეძლოს კლუბისთვის სასიცოცხლო მნიშვნელობის ცვლილებების განხორციელება.
რაც არ უნდა გასაკვირი იყოს, საკმაოდ პოზიტიურადაა განწყობილი „ბარსას“ ყოფილი პრეზიდენტი ჟოან გასპარი, რომელიც კლუბს სათავეში 2000-03 წლებში ედგა. მისი თქმით, ბართომეუმ უნდა აჩვენოს, რომ „ბარსელონა“ ყველაზე მეტად უყვარს და ამ მდგომარეობას ისე მიუდგეს, როგორც პრეზიდენტს შეეფერება. ის თანამდებობაზე უნდა დარჩეს, რადგან სიტუაციის გამოსწორების სხვა ვარიანტი არ აქვს.
გასპარი, ან დასცინის ბართომეუს, ანაც კარგი ბიჭის როლს თამაშობს…
