დაუფიქრებელი გამონათქვამები მეტწილად ბოდიშის მოხდით მთავრდება. „ბარსელონას” ყოფილ თავდამსხმელ, ფრანგ კრისტოფ დიუგარისაც ასე მოუვიდა.
„ერთი წამით არ მინდოდა აუტისტი ადამიანების შეურაცხყოფა. ასეთი რამ მიზნად არ მქონია. ბოდიშს ვიხდი, თუკი ვინმეს გული ვატკინე”, — თქვა მსოფლიოსა და ევროპის ჩემპიონმა.
ახლა კი თავად ამბავი: დიუგარი „ბარსელონაში” მისი თანამემამულის ანტუან გრიზმანის მდგომარეობამ გააბრაზა. გრიზმანს სულ ცოტას და ცოტას ათამაშებენ. „ატლეტიკოსთან” ბოლო შეხვედრაში, მიუხედავად იმისა, რომ უჭირდათ და გოლი სჭირდებოდათ, ძვირად ნაყიდი თავდამსხმელი სულ სამი წუთით შეუშვეს მოედანზე. დიუგარი ამან აღაშფოთა.
„ბარსელონაში” გრიზმანის მეორეხარისხოვან ფეხბურთელად გადაქცევა მისი და ლეო მესის რთულ ურთიერთობას ბრალდება. ზუსტად რა ხდება და როგორ ხდება არავის უთქვამს, მაგრამ ფაქტია, რომ ამ თემაზე კატალონიაში ბევრს ლაპარაკობენ. დიუგარი, უპირველეს ყოვლისა გრიზმანზე გაბრაზდა.
„ვერ გავიგე რისი ეშინია? — თქვა ვეტერანმა RMC Sport-თან ინტერვიუში, — ის ბიჭი (მესი) სიმაღლეში მეტრნახევარი და სანახევროდ აუტისტია. ერთადერთი, რაც გრიზმანმა უნდა გააკეთოს, პასი უნდა მოთხოვოს.
მთელი წელიწადია ლაპარაკობენ, რომ მას მესისთან პრობლემა აქვს. ჰოდა, ადგეს, სახეში ხელი შემოიკრას და გამოფხიზლდეს. დიახ, მესი მას ალბათ მეტ პასს უნდა აძლევდეს, მაგრამ რაც ხდება არ მიკვირს. გრიზმანმა ხომ წამყვანი მოთამაშის პოზიცია დაკარგა. აშკარად შეშინებულია. მივიდეს მესისთან, დაელაპარაკოს. მოაგვაროს პრობლემა…
…რაც შეეხება კიკე სეტიენს, ის არის მწვრთნელი, რომლის საქმეც უკან და უკან მიდის. კარგი კაცია, მაგრამ კარგი მწვრთნელი არ არის. მან არასდროს არ იცის ვინ არის შესაცვლელი. „ატლეტიკოსთან” სერხიო ბუსკეტსი 85-ე წუთზე გაიყვანა და მის ნაცვლად ანსუ ფატი შეუშვა. გრიზმანი საერთოდ 90-ე წუთზე შეიყვანა, ოღონდ ეს გრიზმანის საწინააღმდეგო აქცია კი არ იყო, უბრალოდ სეტიენმა არ იცის გუნდი როგორ ათამაშოს”.
