ქართველები, უცხოეთში პირველები…

თორნიკე შენგელიამ ეპანეთის ჩემპიონატი რომ მოიგო, უკვე იცით. ისიც იცით, რომ თოკო პირველი ქართველია, რომელიც პირენეის ნახევარკუნძულზე ჩემპიონის ტიტულს შეწვდა, თუმც ქართველები სხვადასხვა ქვეყნების ჩემპიონებიც არიან…

მოდით ერთად გავიხსენოთ და გადავავლოთ თვალი ვინ, სად და როდის გახდა ჩემპიონი უცხოეთში …

ცხადია, ყველაზე ტიტულოვანი ზაზა ფაჩულიაა, რომელსაც თითებს NBA-ს ორი საჩემპიონო ბეჭედი უმშვენებს. საქართველოს ნაკრების ყოფილი კაპიტანმა „გოლდენ სტეიტ ვორიორზის“ შემადგენლობაში 2017 და 2018 წლებში მსოფლიოში ყველაზე მაგარი ლიგა მოიგო.

ქართველს ორჯერ აქვს მოგებული ევროპის უძლიერესი ლიგაც – ევროლიგა. და ეს გიორგი შერმადინმა მოახერხა. აღსანიშნავია, რომ ჩვენებური ორი სხვადასხვა გუნდის სახელით გახდა  გამარჯვებული. 2008-09 წლების გათამაშებაში ეს „პანათინაიკოსთან“, ხოლო 2012-13 წლის სეზონში – მეორე ბერძნულ კლუბ, „ოლიმპიაკოსთან“ ერთად მოახერხა. შერმადინს ტრიპლეტიც აქვს შესრულებული – „პანათინაიკოსში“ თამაშის დროს ევროლიგასთან ერთად საბერძნეთის ჩემპიონატი და თასი მოიგო.

თუმცა, ყველაზე მეტი ჩემპიონატი მანუჩარ მარკოიშვილს აქვს მოგებული – მანუს ტიტულების ჩამონათვალი შთამბეჭდავია: ფიბას თასი (2004წ), იტალიის ჩემპიონატი (2002-03), სლოვენიის ჩემპიონატი (2004-05 და 2005-06), თურქეთის ჩემპიონატი (2012-13), VTB ლიგა და რუსეთის ჩემპიონატი (2014-15). მას მოგებული აქვს ასევე იტალიის თასი (2002-03), სლოვენიის თასი (2004-05 და 2005-06) და იტალიის სუპერთასი (2012).

ორი ქვეყნის ჩემპიონია ვლადიმერ ბოისა – „მონტეპასკის“ შემადგენლობაში იტალიის (2006-07) და „ოლიმპიას“ რიგებში სლოვენიის (2002, 2004 და 2005). არის სლოვენიის 4-გზის თასის (2003, 2004, 2005 და 2011) და 3-გზის სუპერთასის (2003, 2004 და 2005) მფლობელი. ამავე გუნდში მოგებული აქვს ადრიატიკის ლიგა (2011).

არც გიორგი ცინცაძე უჩივის ტიტულების ნაკლებობას: ცეესკას შემადგენლობაში რუსეთის ჩემპიონი (2003–04) გახდა; მოსკოვის „დინამოსთან“ ერთად „ულების თასი“ (2005-06) მოიგო; შემდეგ ესტონეთში გადაინაცვლა, სადაც „ტარტუს“ შემადგენლობაში ორჯერ იჩემპიონა (2006-07 და 2007-08). ამავე გუნდით გახდა ბალტიის ლიგისა და ესტონეთის თასის მფლობელი (2010-11). ცინცაძის საჩემპიონო ჩამონათვალში ბოლო უკრაინაა (2012-13).

ვნახოთ ვინ შეემატება ამ სიას…