კორონავირუსის პანდემია ჯერ კიდევ მძვინვარებს და კარანტინის წესებიც კვლავინდებურად ძალაშია, ამიტომ „ლივერპულის” ფეხბურთელები ისე, როგორც 2016-ში ლესტერელები, რომელიმე თანაგუნდელის სახლში ვერ შეიკრიბებიან და გახსნის პირას მიყვანილი შამპანურით ერთად ვერ დაელოდებიან კონკურენტი გუნდის შედეგს, მაგრამ დღეს ყველაფერი შეიძლება გაირკვეს: „მანჩესტერ სიტი” ლონდონში „ჩელსის” ეთამაშება.
თუ „სიტი” დასავლეთლონდონელებს ვერ დაამარცხებს, „ლივერპული” 30 წლიანი ხელმოცარვის შემდეგ კვლავ ინგლისის პირველი გუნდი გახდება, მაგრამ თუ პეპ გვარდიოლას გუნდი მოიგებს, მაშინ 2 ივლისს „ეტიჰედზე” გაიმართება სუპერმატჩი: ჩემპიონები ტიტულის მოცილეთა წინააღმდეგ, რომელშიც მოცილეებს ფრეც მისცემს ხელს.
და რა მოხდება თუკი მერსისაიდელები „ქალაქელებთან” დამარცხდებიან? მაშინ, ისინი 5 ივლისს მაინც გახდებიან ჩემპიონები, როდესაც „ენფილდზე” „ასტონ ვილას” მოუგებენ და ბოლოს და ბოლოს შამპანურიც გაიხსნება.
გუშინ კი, ვირუსული უქმობის შემდეგ, იურგენ კლოპის ბიჭები „ენფილდ როუდზე” დაბრუნდნენ და მართალია, ტრიბუნიდან You’ll Never Walk Alone-ს არავინ უმღეროდათ, „კრისტალ პალასს” 4:0 მოუგეს. ტრენტ ალექსანდერ-არნოლდის, მო სალაჰის, ფაბინიოსა და სადიო მანეს გოლები მნიშვნელოვანთან ერთად მშვენიერი სანახავიც გახლდათ: ორი შორიდან ეფექტური დარტყმით და ორიც კომბინაციური თამაშის შედეგად გავიდა.
„ლივერპულს” აგერ უკვე 17 თვეა შინ პრემიერლიგის შეხვედრაში ქულა არ დაუკარგავს და, როგორც ჩანს, მასზე არც მაყურებლის არყოფნა მოქმედებს.
„კრისტალ პალასი” „ენფილდზე” ზედიზედ სამი მოგებითა და ერთი ფრით ზურგგამაგრებული ჩავიდა, მაგრამ ვინაიდან თილისმა, ვილფ ზაჰა მე-15 წუთზევე დაუშავდათ, უკბილოდ დარჩნენ. „ლივერპული” კი თავისი შეუჩერებელი საუკეთესო შემადგენლობით იყო და მეტოქე დაფლითა.
