2013 წლის შემდეგ დევიდ ბექემს ამ რეიტინგში მყარად ეკავა პირველი საფეხური. საუბარია კარიერის განმავლობაში ყველაზე მეტი ფულის მშოვნელ ინგლისელ სპორტსმენთა რეიტინგზე. გავიდა ყოველწლიური დეკლარაციების შევსების ვადა და აღმოჩნდა, რომ ფორმულა 1-ს უპირობო ლიდერმა ლუის ჰემილტონმა ბექზის 244 მილიონ დოლარიან მაჩვენებელს ერთბაშად 29 მილიონით “გადააბიჯა”. გასულ წელს “მერსედესთან” გაფორმებული 50-მილიონდოლარიანი კონტრაქტის გარდა, ავტომრბოლმა 19 მილიონი სპონსორებისგან მიიღო.ბექემი გასაგებია – საფეხბურთო ბიზნესშია, მაგრამ რაში ხარჯავს ჰემილტონი უზარმაზარ შემოსავალს? თავადვე ამბობს: „ღვინოების არაფერი გამეგება, ვერც ხელოვნების ნიმუშებში ვერკვევი. სამაგიეროდ, ძალიან კარგად ვიცი და მიყვარს სუპერკარები“.
აქამდეც ცნობილი იყო, რომ ლუისის ავტოსაჯინიბოში 9 ექსკლუზიური მოდელი იდგა, რომელთა საერთო ღირებულება 30 მილიონს აღემატება. ახლახანს გაირკვა, რომ 3 წლის წინ აუქციონზე ინკოგნიტო მყიდველის მიერ 17 მილიონ დოლარად შეძენილი Mclaren F1-ც ჰემილტონის ყოფილა.
ავტოების გარდა, პილოტს არც უძრავ ქონებაში ენანება ფული. ნიუ იორკში რამდენიმე წლის წინ 52 მილიონად შეძენილ სამსართულიან პენტჰაუსს ჰემილტონი ყიდის, რადგან იქვე ახლოს მეორე იყიდა 41 მილიონად. ამას ემატება 23 მილიონიანი სასახლე ლონდონის ვაკეში – კენსინგტონში, აგრეთვე ბინები მონაკოსა და ლოს-ანჯელესში.
მოკლედ, ლუის ჰემილტონს ღამის გასათევის პრობლემა ნამდვილად არ აქვს. არც საკუთარი ფინანსური რეკორდის დამხობა გაუჭირდება, რადგან გულში სპორტული რეკორდის დამხობა თუ არა, გამეორება მაინც აქვს ამოჭრილი – ლეგენდარული მიხაელ შუმახერის შედეგთან ერთი საჩემპიონო ტიტულიღა აშორებს.
