ზოგს შეიძლება გაუგია, ზოგს კი არა. არის ასეთი ფეხბურთელი ჯორდან ჰაფტონი, რომელიც 2018 წლის შემდეგ ინგლისის პირველი ლიგის (ზემოდან მესამე დონეა) „დონზში” თამაშობს, ადრე კი „ჩელსიში” იყო. უფრო სწორედ, მთლად „ჩელსიშიც” ვერ იყო… მოკლედ, ისტორია ასეთია:
— „უიმბლდონთან” ამხანაგურს ვთამაშობდით, — იგონებს 24 წლის ნახევარმცველი, — მაშინ „ჩელსის” მწვრთნელი იყო ჟოზე მოურინიუ. და შესვენებაზე ჟოზემ ნემანია მატიჩს ტყავი გააძრო. ის სერბს უყვიროდა; ემუქრებოდა, რომ იქვე, შესვენებაზევე ტრანსფერზე დააყენებდა და თავიდან მოიშორებდა”.
როგორც შემდეგ გაირკვა, „განსაკუთრებულს” ასე ფეხბურთელების, კერძოდ კი მატიჩის გამოსაფხიზლებლად უყვირია, მაგრამ… ჰაფტონისთვის თვალები აუხელია. ფეხბურთელი, რომელიც თითქოსდა არ იყო უნიჭო, მიხვდა, რომ „ლურჯების” ძირითადში ვერ მოხვდებოდა და „ჩელსიდან”, იჯარის წესით, სხვადასხვა კლუბებში დაიწყო მოგზაურობა. თან, ყველა ეს კლუბი დაბალი ლიგიდან იყო. მოკლედ, მოურინიუს ყვირილის შემდეგ ჰაფტონმა გადაწყვიტა, კარიერა ქვედა დონეზე გაეგრძელებინა.
2015-18 წლებში ჯორდან ჰაფტონმა მოიარა „ჯილინგემი”, „პლიმუთი” და „დონკასტერი”, რომელთანაც ორჯერ გააფორმა დროებითი კონტრაქტი. 2018 წელს კი. როგორც მოგახსენეთ, ის „დონზში” გადავიდა.
რაც შეეხება მატიჩს, „განსაკუთრებულს” სერბი არსად გაუშვია. პირიქით, ის 2014-17 წლებში „ჩელსიში” თამაშობდა, 2017 წელს კი „მანჩესტერ იუნაიტედში” გადავიდა, სადაც… ისევ და ისევ ჟოზე მოურინიუმ მიიწვია.
