კატალონიურ გრანდში უკვე დაიწყეს მუშაობა ახალ ბიუჯეტზე, რომელიც ძალაში მომავალი სეზონიდან შევა. საერთო ჯამში კლუბის გასავალი 250 მილიონი ევროთი შემცირდება. აქედან ლომის წილი ხელფასებზე მოდის – სახელფასო უწყისების სეკვესტრი 230 მილიონ ევროს შეადგენს.
წლეულს „ბარსელონას“ ბიუჯეტი მილიარდ 47 მილიონი ევროა. აქედან 65%, ანუ 680 მილიონი ხელფასებზე მიდის. ახალი ბიუჯეტით მთელი გასავალი 750 მილიონ ევროში უნდა ჩაეტიოს, ხელფასად კი მხოლოდ 450 მილიონი გაიცემა.
საიდან ამხელა ეკონომია? მარტივი პასუხი იქნებოდა ფეხბურთელთა ხელფასების შეკვეცა, მაგრამ მოქმედ კონტრაქტს ფეხბურთელები ბოლომდე დაიცავენ. ახალი სტრატეგია შემდეგში მდგომარეობს: კლუბმა მაღალანაზღაურებადი ფეხბურთელები ნაკლებ ხელფასზე წამომსვლელებით უნდა ჩაანაცვლოს – ან სატრანსფერო ბაზრიდან, ანაც კლუბის სტრუქტურაში აღზრდილებით.კლუბში ირწმუნებიან, რომ ეს გავლენას არ მოახდენს სპორტულ შედეგებზე. ბუნებრივია, არიან ხელშეუხებლები. მაგალითად, იმავე მესისთან და ტერ შტეგენთან ახალი კონტრაქტებია გასაფორმებელი. სხვა დროს ეს უფრო დიდი თავსატეხი იქნებოდა, მაგრამ დღევანდელ ვითარებაში საკუთარი ნებით გუნდიდან წასვლის სურვილი არავის აქვს.
ხელფასების გარდა „ბარსელონა“ შეამცირებს საოპერაციო ხარჯებს კლუბის სტრუქტურაში არსებული სხვა სახეობების გუნდებისთვის, გადახედავს კონტრაქტებს მომმარაგებლებთან, გაყიდის სტადიონის სახელს და ასე შემდეგ.
ცუდ დროს მოუსწრო კატალონიელებს კრიზისმა და აშლილობამ. ერთ-ერთი ყველაზე ხელგაშლილი კლუბი დღეს ფინანსური და მორალური ბანკროტობის ზღვარზეა.
