12 მარტის შემდეგ პირველი საჩოგბურთო ტურნირი, რომელშიც ATP-ს მოთამაშეები იღებენ მონაწილეობას, გერმანიაში დაიწყო, თუმცა, განსხვავებული წესებით – მატჩებს მაყურებელი არ ესწრება, ასევე არ არიან ხაზის მსაჯები და ბურთის მიმწოდებელი ბიჭუნები.
კობლენცში მიმდინარე შეჯიბრში 8 ჩოგბურთელი მონაწილეობს, რომლებიც ATP-ს 100-ეულში არ შედიან. მათ შორის არის დასტინ ბრაუნი, ვისაც უიმბლდონზე თვით რაფა ნადალი დაუმარცხებია.
ყოველი მატჩის შემდეგ მსაჯების კოშკურა დეზინფიცირდება, ყველა მონაწილეს ნიღბები და ხელთათმანები ეძლევა, მაგრამ თამაშის დროს არ იყენებენ. ჩოგბურთელებს ასევე ყველა შეხვედრის წინ ტემპერატურას უზომავენ, მაგრამ ტესტები კორონავირუსზე არ უტარდებათ.
მასპინძელი ბრაუნის გარდა პირველი მერცხლები არიან: იანიკ ჰანფმანი, იოანეს ჰარტაისი, კონსტანტინ შმიტცი, ფლორიან ბროშკა, იან-მარკ ვერნერი (ყველა გერმანია), ბენჯამინ ჰასანი (ლიბანი), იან ჩოინსკი (დიდი ბრიტანეთი).
მონაწილეები წრიული სისტემით თამაშობენ, რისთვისაც გარკვეულ ჰონორარს მიიღებენ. გარდა ამისა, საპრიზო ფონდი 3 000 ევროა.
