სამკვირიანი შეჩერება კი გადაწყვიტეს, მაგრამ დიდი შანსია პრემიერლიგის შეფებს სეზონის დასრულებულად გამოცხადება მოუწიოთ. ყოველ შემთხვევაში ზეწოლა დიდია და ქვეყანაში COVID 19-ის გავრცელების დინამიკაც ამას უწყობს ხელს.
ინგლისის უმაღლესი და მსოფლიოს ერთ-ერთი უმშვენიერესი ლიგის 20 მეწილე ვერდიქტის გამოსატანად ორიოდ დღეში შეიკრიბება. რას შეიძლება ველოდოთ?
სულ მცირე ორ კლუბს გაუხარდება თუკი სეზონი გაუქმდება და „ლივერპული” 1990 წლის შემდეგ თავის პირველ ჩემპიონის ტიტულს ვერ მოიპოვებს. იმავდროულად ცნობილია, რომ საკუთრივ პრემიერლიგის შეფებს უნდათ, რომ შეჯიბრება გაგრძელდეს.
მეორე მხრივ, იზრდება იმ კლუბების რაოდენობა, რომლებიც ხვდებიან, რომ ფეხბურთი ბრიტანეთის კუნძულებზე თვეობით ვეღარ დაბრუნდება — კორონავირუსის დამარცხება 3 აპრილამდე გამორიცხულია. პრობლემა შეიძლება, მაგალითად, შუა ზაფხულამდე ვერ გადაიჭრას. ასეთ შემთხვევაში კი გამოდის, რომ ეს ჩემპიონატი უნდა განულდეს და აგვისტოდან ახალი დაიწყოს.
სეზონის შედეგების დღევანდელი ცხრილის მიხედვით გამოცხადება არ გამოვა. არითმეტიკულად არც ჩემპიონია ცნობილი; არც ის, თუ ვინ უნდა ითამაშოს ევროთასებზე; არც გავარდნილი გუნდები; არც ის, ქვემოდან ვინ უნდა ამოვიდეს და ა.შ.
ამ სიტყვების წერის მომენტში ვიცით, რომ ახალი გრიპით დაავადდნენ „არსენალის” მწვრთნელი მიკელ არტეტა და „ჩელსის” გარემარბი კალუმ ჰადსონ-ოდოი. „ვესტ ჰემის” მწვრთნელი დევიდ მოიესი კარანტინშია. „ევერტონი” მთლიანად თვითიზოლაციაში წავიდა.
პრემიერლიგის შეფებს შესაძლოა ძალიანაც უნდათ შეჯიბრების განახლება, მაგრამ არსებობს ქვეყნის ხელისუფლება, რომელიც ან დართავს ამის ნებას, ან არა. გასაგებია, რომ დიდძალი ფული იკარგება, მაგრამ ხალხის ჯანმრთელობა ყველაფერზე მაღლაა.
საინტერესო კი ის არის, რომ მართალია, ინგლისში ზედა ოთხი ლიგა დაიკეტა, მაგრამ ეგრეთწოდებული ნონ-ლიგა აგრძელებს ბურთაობას, გეგონება ვირუსი ცუდ ფეხბურთელებს არაფერს ერჩოდეს.
ფეხბურთის ასოციაციამ განაცხადა, რას ვიზამთ, ყველა ლიგა დამოუკიდებელი ერთეულია და გადაწყვეტილება თავად უნდა მიიღოსო, ისინი კი ამ ალიაქოთში ეტყობა აღარავის ახსოვს.
თუმცა, სად წავლენ.
