„ლაიფციგთან” შეხვედრაში „ტოტენჰემი” შინ დამარცხდა 0:1, დელე ალი 64-ე წუთზე შეცვალეს და ის გაბრაზდა. 23 წლის ნახევარმცველმა თავი ვერ მოთოკა, ჯერ ბუცები დაანარცხა, შემდეგ კი წყლის ბოთლი.
„სფურზის” მწვრთნელმა ჟოზე მოურინიუმ თქვა: „ვფიქრობ, ის საკუთარ თავზე გაბრაზდა და არა ჩემზე. დელე კარგად მიხვდა, რატომაც შევცვალე. მისი გასვლის შემდეგ გუნდის თამაში გამოსწორდა”.
„ლაიფციგთან” მატჩში ლონდონელებს ჰარი კეინი და სონი აკლდნენ, ალის კი მათ არყოფნაში უნდა გამოეჩინა თავი, დანაკლისი შეევსო. მან ეს ვერ შეძლო, რასაც ის მოჰყვა, რომ 58-ე წუთზე ბენ დევისმა „ტოტენჰემის” საჯარომიში კონრად ლაიმერი წააქცია, ტიმო ვერნერმა პენალტი გაიტანა და… „სფურზისთვის” მეოთხედფინალში გასვლა გართულდა.
სტუმართა გოლზე მოურინიუს მძაფრი რეაქცია ჰქონდა. პორტუგალიელმა ერთბაშად ორი ფეხბურთელი შეცვალა, რომელთაგან ერთი სწორედ ის დელე ალი იყო, სიბრაზისგან ბუცების და ბოთლის სროლა რომ დაიწყო.
მართალია, მოურინიუმ თქვა ალის გასვლის შემდეგ გუნდის თამაში გამოსწორდაო, მაგრამ გულშემატკივარმა ეს მაინცდამაინც ვერ შეამჩნია. „სფურზი” ფრანგ მეკარეს უგო ლორისს უნდა უმადლოდეს შეხვედრა მათთვის კიდევ უფრო სამწუხარო ანგარიშით რომ არ დასრულდა.
მოურინიუ: „დღევანდელ მატჩში ორი რამის დანახვა შეიძლებოდა. პირველი, შესანიშნავი ბიჭების, რომლებიც მოედანზე ყველა ღონეს ხმარობდნენ და მეორე იმის, თუ რა დონეზე არიან ეს ბიჭები დღეს. რაც ჩვენ ვაკეთეთ ჰგავდა ბრძოლას თოფით, რომელშიც ტყვიები არ ეწყო. თავს ზევით ძალა არ არის.
წარმოიდგინეთ „ბარსელონას” მესის, სუარესის და გრიზმანის ან „ლივერპულს” მანეს, სალაჰის ან ფირმინოს გარეშე რომ ეთამაშა.
რაც შეეხება ანგარიშს, 1:0 10:1 არ არის. ჯერ ყველაფერი წინ გვაქვს. ჩვენ სულაც არ ვიქნებით პირველი გუნდი, რომელმაც შინ წააგო, სტუმრად კი გაიმარჯვა.
იმედს, რომ ყველაფერი კარგად იქნება, ჩემი ფეხბურთელების მენტალიტეტი მაძლევს”.
