არნახულად ბარაქიანი უქმეები გამოუვიდათ ქართველ მორაგბე ლეგიონერებს. 7 ლელო! ასეთი შედეგი ჩემპიონთა თასისა და ჩელენჯ კაპის რომელიმე ცალკეულ ტურში ან საშეჯიბრო დღეს აქამდე წარმოუდგენელი იყო, მაგრამ დღეს ეს რეალობაა. ძირითადად ფრანგულ კლუბებში თავმოყრილ ქართველებს შორის არა მხოლოდ პირველხაზელი მორკინალები არიან, არამედ შუამარბებისა და გარემარბების გამოკლებით ყველა პოზიციის მოთამაშეა, რომლებიც თანდათან ეჩვევიან უმაღლეს დონეზე თამაშს და შედეგიც სახეზეა.
სამწუხრო კი მხოლოდ ისაა, რომ ტურნირების მეოთხედფინალში ქართველთა მხოლოდ 4 კლუბი გავიდა – 2-2 თითო ტურნირზე. ყველაფრის ვრცლად მოყოლა ძალიან შორს წაგვიყვანს, ამიტომაც მშრალი ფაქტებით შემოვიფარგლებით.
ჩემპიონთა თასის პლეი-ოფში „კლერმონი“ და „რასინგი“ გავიდნენ და ბედის ირონიით, ნახევარფინალში მხოლოდ ერთი მათგანი თუ გავა, რადგან ისინი ერთმანეთს შეერკინებიან. ორივე კლუბმა ბოლო ტურებში ტრავმირებული ქართველების გარეშე იასპარეზა – კლერმონელი დავით ზირაქაშვილისა და პარიზელების: ვასილ კაკოვინისა და გურამ გოგიჩაშვილის გამოკლებით. სხვათა შორის, ეს უკანასკნელი ნაკრებშია გამოძახებული.
ჩვენებურებმა კი ჯგუფური ეტაპის ბოლო ტურში მხოლოდ „ლიონისა“ და „მონპელიეს“ შემადგენლობაში ითამაშეს, თანაც იგივე პროპორციით, როგორც წინა ტურში – 1:4.
ლიონელთა სასტარტო შემადგენლობაში კვაჭი ბადრი ალხაზაშვილი იყო, რომელმაც 46 წუთი ითამაშა, ხოლო მისი გუნდი შინ ინგლისის „ნორთჰემპტონთან“ 24:36 დამარცხდა.
„მონპელიემ“ კი კარი გაიჯახუნა – ირლანდიურ „კონახტს“ 35:29 მოუგო. ფრანგებმა ანგარიში პირველივე შეტევით გახსნეს – წამმზომს მესამე წრე არ ჰქონდა დასრულებული, როცა ლევან ჩილაჩავა მეტოქის ლელოში ბურთიანად შევარდა! ეს ლევანის პირველი და უკანასკნელი ლელო იყო მიმდინარე ტურნირზე, რადგან გუნდი ჯგუფში ჩარჩა.
ჩილაჩავამ 51 წუთი ითამაშა, ისევე როგორც ახალგაზრდა უჩა ჭეიშვილმა, ვინც მიშა ნარიაშვილმა ჩაანაცვლა. 68-ეზე კი თამაშში კოტე მიქაუტაძე ჩაერთო. ჩილაჩავა, ნარიაშვილი და მიქაუტაძე ნაკრების შეკრებაზე არიან დაბარებულები.
ახლა კი ჩელენჯ კაპის შესახებ, სადაც ქართველებმა 6 ლელო გაიტანეს.
„ენისეიმ“ მე-6 მატჩიც წააგო – ამჯერად უელსში „დრაგონსთან“ – 5:47. ქართველებს თავი არ გამოუჩენიათ, არადა ციმბირელთა შორის უხვად კი იყვნენ. ნიკა ხატიაშვილმა ტრადიციულად ბევრი – 73 წუთი ითამაშა, წინა ტურის სიმბოლურ ნაკრებში მოხვედრილი მიშო გაჩეჩილაძე შეუცვლელად იყო მინდორზე, ხოლო დათო მესხი და დათო კაჭარავა პირველიდან მე-60 წუთამდე ირჯებოდნენ. გაჩეჩილაძე და კაჭარავა ნაკრებში გამოიძახეს.
ომარ ოდიშვილის „პომ“ კი საკუთარ თავს უნდა დააბრალოს, რომ პლეი-ოფს მიღმა დარჩა – ჯგუფის გამარჯვებულ „ლესტერს“ პირველ ტაიმში 24 ქულა გაუტანა, თან 3 ლელო დაუდო. მეორე ნახევრის ამოცანა გამარჯვების შენარჩუნება და თან მე-4 ლელოს გატანა იყო, რომელიც ბონუს ქულას მისცემდა. მაგრამ „პომ“ ქულაც ვერ წაამატა და მართალია, 24:17 მაინც მოიგო, მაგრამ მეორეადგილოსანთა რეიტინგში უელსური „სკარლეტსივით“ 19 ქულა დააგროვა, მაგრამ კონკურენტზე უარესმა ლელოების სხვაობამ დააღალატა… 22 წლის ბურჯმა ომარ ოდიშვილმა მოედანზე ბოლო 14 წუთი გაატარა.
მეორეადგილოსანთა რეიტინგში ყველაზე ცუდი შედეგი „ბრივმა“ დააფიქსირა – 14 ქულა. თუმცა, ამ გუნდმა „სტად ფრასე“ ტურნირზე მეორედაც დაამარცხა – 33:29, და რაც ყველაზე სასიამოვნოა, ამ 33 ქულიდან ნახევარზე მეტი – 19 ქართველებმა მიითვალეს – ბორჯღალოსანთა მომავალმა ლიდერებმა. ოთია გიორგაძემ მე-15 და 44 წუთებზე 2 ლელო გაიტანა და ტურნირი 3 ლელოთი დაასრულა. ვასკა ლობჟანიძემ თავისი ლელო 57-ეზე მიითვალა და პირადი სატურნირო ანგარიში 4 ლელომდე გაზარდა, ხოლო თედო აბჟანდაძემ ორი ლელო გარდასახა და ჩელენჯ კაპი 35 ქულით დაამთავრა! გიორგაძემ და ნორჩმა ვანო კარკაძემ 52 წუთი გაატარეს მოედანზე, ლობჟანიძემ – 62, აბჟანდაძე შეცვლაზე 50-ეზე შევიდა, ხოლო ჩაფლავებულ პარიზელთა სასტარტოში გიორგი მელიქიძემ 50 წუთი ითამაშა. ამ მატჩის ხუთივე მონაწილე ქართველმა ნაკრებში გამოძახება მიიღო.
ზურა ჟვანიას გარეშე მოთამაშე ლონდონის „უოსპსმა“ შინ გამანადგურებელი მარცხი იგემა – 0:27. თუმცა, მეტოქის ვინაობიდან გამომდინარე, ეს არც არავის გაკვირვებია – წლეულს „ბორდოს“ ვერც საფრანგეთში აჩერებენ და ვერც ევროპაში. ბურჯებმა ლექსო ყაულაშვილმა და ლაშა ტაბიძემ ბოლო 22 წუთი ითამაშეს, მესამეხაზელმა ბექა გორგაძემ – მხოლოდ 14, მაგრამ მატჩს საბოლოო წერტილი სწორედ მან დაუსვა.
ეს ბექას მეორე ლელო იყო მიმდინარე ტურნირზე და ცხადია, ისიც სანაკრებო სიაში მოხვდა. „ბორდო“ კი მეოთხედფინალშია, სადაც თანაჯგუფელ „ედინბურგს“ უმასპინძლებს. ტურნირის რეგლამენტიდან გამომდინარე, ასეთი რამ გამორიცხული სულაც არაა, რადგან 8 მეოთხედფინალისტი წყვილდება პრინციპით I-VIII, II-VII და ა.შ.
ამ „ედინბურგმა“ ბოლო ტურში გიორგი თეთრაშვილის „აჟენს“ საკუთარ მოედანზე ასევე მშრალი ანგარიშით – 36:0 მოუგო. თეთრაშვილი სასტარტოში იყო და 53 წუთი ითამაშა, თუმცა ნაკრების მწვრთნელთაგან მიწვევა მანაც მიიღო.
დაბოლოს, „ტულონისა“ და ბექა გიგაშვილის ვაჟკაცობის შესახებ. ტულონელებმა თანამემამულე „ბაიონი“ სასტიკად გაამწარეს – 50:6, ხოლო გიგაშვილმა მხოლოდ მეორე ტაიმი გაატარა მოედანზე, თუმცა 47-ე და 67-ე წუთებზე წყვილი ლელოს გატანა მაინც მოასწრო. სხვათა შორის, გაჩეჩილაძესთან ერთად გასული ტურის სიმბოლურში გიგაშვილიც მოხვდა და უეჭველია, რომ ქართველი ბურჯი ამ ტურის ლაურეატთა შორისაც იქნება. რასაკვირველია, ის სანაკრებო სიაშიცაა. საინტერესოა, რომ „ბაიონში“ ბოლო ნახევარი საათი იოანე იაშაღაშვილმა ითამაშა – ქართული რაგბის კიდევ ერთმა ამომავალმა ვარსკვლავმა.
„ტულონი“ კი სრულიად ჩელენჯ კაპზე საუეთესო შედეგით მეოთხედფინალში გავიდა და საკუთარ „სტად ფელიქს მაიოლზე“ თანაჯგუფელ „სკარლეტსს“ უმასპინძლებს, რომელიც მანამდე ორჯერ იოლად დაამარცხა.
აქვე მეოთხედფინალების სრული სიაც:
ჩემპიონთა თასი
კლერმონი (საფრანგეთი) – რასინგი (საფრანგეთი)
ტულუზი (საფრანგეთი) – ალსტერი (ირლანდია)
ექსეტერი (ინგლისი) – ნორთჰემპტონი“ (ინგლისი)
ლენსტერი (ირლანდია) – სარასენსი (ინგლისი)
ჩელენჯ კაპი
ბორდო (საფრანგეთი) – ედინბურგი (შოტლანდია)
ტულონი (საფრანგეთი) – სკარლეტსი (უელსი)
ლესტერი (ინგლისი) – კასტრი (საფრანგეთი)
ბრისტოლი (ინგლისი) – დრაგონსი (უელსი)
ევროთასების მეოთხედფინალები 3-5 აპრილს გაიმართება.
