აგერ, FA CUP-ის 1/32 ფინალში მერსისაიდული დერბი გაიმართა. თან ეს ხომ იცით როგორი თამაშია? პრემიერლიგაში, ყველაზე მეტი წითელი ბარათი ამ გუნდების შეხვედრებში დაფიქსირებულა. მოკლედ, საუკუნის განმავლობაში „ლივერპულსა“ და „ევერტონს“ შორის ომი იყო, ბოლო ხუთი წელი კი ამ დერბიმ თავისი პეწი დაკარგა. კი, „ევერტონი“ ინგლისში ბოლო იყო, ვინც წინა სეზონში თანაქალაქელებს ქულები დააკარგვინეს (რაც, როგორც საბოლოოდ გაირკვა, წითლებს ჩემპიონობის ფასად დაუჯდათ), თუმცა მოედანზე ის ცეცხლი აღარ ანთია, რომ ენთო.
მოიესის „ევერტონი“ მაგარი გუნდი იყო, გულით თამაშობდა და „გუდისონ პარკზე“ ქულებს ვერავინ გეგმავდა. საერთოდ, „ტკბილეულები“ ასეთებიც უნდა იყვნენ, სახასიათონი, თორემ „ლივერპულს“ კონკურენციას სხვა რაში გაუწევენ!?
ცნობილმა ინგლისელმა ფეხბურთელმა და ახლა ექსპერტმა, პოლ მერსონმა დანკან ფერგიუსონის (ძველი ევერტონელის) დაბრუნებას წერილი მიუძღვნა. მან „ტკბილეულების“ როგორც დიდების პერიოდი, ასევე ჩავარდნა გაიხსენა და იმ საერთოზე ისაუბრა, ზემოთ გაკვრით რომ ვახსენე:
„დანკან ფერგიუსონისთვის სამართლიანი თამაში ძველ „ევერტონთან“ ასოცირდება – ბიჭები ვეფხვების თვალებით გიყურებენ და მოედანზე საქმეს ყველანაირად გირთულებენ. ეს ის არის, რაც გულშემატკივრებს სურთ. შოტლანდიელმა ფანები აღაგზნო და ფენომენალური ატმოსფერო შექმნა.ქომაგები ჯებირებთან იდგნენ და თითოეულ ვარდნაზე რეაგირებდნენ. ეს არის „ევერტონი“ – ვნება. „გუდისონ პარკი“ ყოველთვის რთულად ასაღები არენა იყო და მომავალშიც ასე უნდა დარჩეს“
ასე გატაცებით მერსონი „ჩელსისთან“ მოგებულ შეხვედრას აღწერს. ფერგიუსონი „ევერტონს“ სათავეში სულ ოთხი თამაში ედგა, თუმცა აქედან ყველა მოწინავე გუნდებთან იყო და არც ერთი წაუგია: „ევერტონი“ 3:1 „ჩელსი“; „მანჩესტერი“ 1:1 „ევერტონი“; „ევერტონი“ 2:2 „ლესტერი“ (პენ: 2:3); „ევერტონი“ 0:0 „არსენალი“.
მოვიდა კარლო ანჩელოტი, „ნიუკასლთან“ და „ბარნლისთან“ მოსაგები კი მოიგო და თუ „სიტის“ მეორე გუნდთან მარცხის გამო არ დავძრახავთ, „ლივერპულის“ მესამე გუნდთან წაგება (0:1) კატასტროფად უნდა შევრაცხოთ.
იქნებ, „ევერტონი“ არ არის ის კლუბი, სადაც გენიალური კარლო უნდა მუშაობდეს, იქნება მას სწორედ გიჟმაჟი ფერგიუსონი სჭირდება?!
მგონია, რომ დანკანი ამ თამაშს არ წააგებდა. შთაბეჭდილებას ტოვებს, რომ ფეხბურთელებმა მოედანზე გული თუ არ დადეს, ჯერ მათ დახოცავს, შემდეგ კი თავსაც მოიკლავს.
„ევერტონი“ სხვა გზას დაადგა. ყოველდღე იწერება, რომ ანჩელოტი ხამესის შესაძენად ყველაფერს აკეთებს. შეიძლება ბოლო ათწლეულში „ტკბილეულებში“ ამ ხარისხის ფეხბურთელს არც უთამაშია, თუმცა არც იმხელა გაქანება აქვს ფილ იაგიელკას, სილვიენ დისტინს, ლეიტონ ბეინსს, ჯონი ჰეიტინგას, ლეონ ოსმანს, კიმ კეჰილსა და დანკან ფერგიუსონს შეშურდეთ.
… ყველა „ლივერპულზე“ ლაპარაკობს და გადავწყვიტე „მერსისაიდზე“ კიდევ ერთი გუნდი გამეხსენებინა.
