კერტის ჯონსის ულამაზესი დარტყმით „ლივერპულმა” სათასო მერსისაიდური დერბი მოიგო – 1:0. „წითლები” „ლურჯებს” ამ შეხვედრაში ახალგაზრდული შემადგენლობით ეთამაშნენ. მატჩის შემდეგ იურგენ კლოპმა თავისი „ბავშვებისთვის” ქების სიტყვები არ დაიშურა.
ჯონსი ლივერპულელი ბიჭია, რომელმაც ამ დღეს ჯერ ავადმყოფობა დაამარცხა და შემდეგ მოწინააღმდეგე. სტატისტიკოსებმა ხელად აღმოაჩინეს, რომ ის „ლივერპულის” იმ მოთამაშეთა შორის, რომელთაც ოდესმე „ევერტონის” კარში გოლი გაუტანიათ, უმცროსობით მეორეა — როდესაც ბურთი ცხრიანში მოჭრა 18 წლის და 340 დღისა იყო.
კარლო ანჩელოტის უძლიერესი შემადგენლობის წინააღმდეგ კლოპმა ძირითადის 9 ფეხბურთელი დაასვენა, ხოლო მათ შორის ვინც ათამაშა, ხუთი ოცისაც არ იყო.
იურგენ კლოპი: „ეს გახლდათ საოცარი შეხვედრა, რომელშიც ზღაპრული გოლი სკაუსერმა (ანუ ლივერპულელმა) გაიტანა. ამაზე მეტს ვინ ინატრებდა? ჩემმა ბიჭებმა ვაჟკაცური ფეხბურთი ითამაშეს. მე ამ მატჩის ყოველი წამით ავღფრთოვანდი.
ჩვენ ვნახეთ დაუჯერებელი ინდივიდუალური თამაში როგორც ბავშვებისგან ასევე დიდებისგან.
ერთადერთი, რაც არ მინდოდა ფრე იყო. მის თავიდან ასაცილებლად, გარკვეული რისკები გავწიეთ და გაგვიმართლა. ამდენი ცვლილების მიუხედავად რომ მოიგებ, გამარჯვება უფრო ტკბილი გამოდის.
თუ პრეტენზია არ გაქვს, რომ ძირითადში გეკუთვნის ადგილი, ამ ბავშვებმა რომ ითამაშეს ისე ვერ ითამაშებ.
გოლი კი საოცარი გავიდა. კერტისი პირველად რომ ვნახე 15 წლისა იყო. მაშინვე გავიფიქრე, ეს ბიჭი განსაკუთრებულია, მეთქი. ასეთ შესრულებას თავდაჯერებულობა სჭირდებოდა და ჯონსი სწორედაც თავდაჯერებული ბიჭია. ზოგადად, სკაუსერები თავდაჯერებული ხალხია”.
კერტის ჯონსი: „ჩვენს მწვრთნელს უყვარს როდესაც სირთულეებს არ ეპუები და თავს არ უხრი. ასე რომ სწორად მოვიქეცი ავადმყოფობა რომ დავმალე. დღეს დიდებული დღე მქონდა. მე ხომ ძალიან ახალგაზრდა ვარ და თან ადგილობრივი”.
ეს გახლდათ იურგენ კლოპის ზედიზედ მე-11 მერსისაიდური დერბი წაგების გარეშე.
შეხვედრაში მონაწილეობა მიიღო ჰარვი ელიოტმა, რომელიც შეიქნა „ლივერპულის” ისტორიაში ყველაზე ახალგაზრდა ფეხბურთელი ასოციაციის თასსა და „ევერტონის” წინააღმდეგ რომ გავიდა მოედანზე. ამ დღეს ის 16 წლის და 276 დღის იყო.
