ორშაბათ საღამოს, „ფრანს ფუტბოლის” „ოქროს ბურთი” ლეო მესიმ მოიგო. მას ჩამორჩნენ „ლივერპულის” ჰოლანდიელი მცველი ვირჯილ ვან დაიკი და „იუვენტუსის” პორტუგალიელი ვარსკვლავი კრიშტიანო რონალდუ.
რონალდუ, როგორც მოსალოდნელი იყო, დაჯილდოების ცერემონიალს არ დასწრებია. ის იტალიაში დარჩა, სადაც „გრან გალა დელ კალჩოზე” სერა A-ს საუკეთესო მოთამაშისა და თავდამსხმელის პრიზები მიიღო.
ვან დაიკი კი პარიზში გახლდათ. გამოკითხვის თანახმად ის მესის ჩამორჩა, რონალდუს კი გაუსწრო. სწორედ იქ, ცერემონიალის დაწყებამდე დაუსვეს ჟურნალისტებმა ასეთი კითხვა — რონალდუს არჩამოსვლა იმას ხომ არ ნიშნავს, რომ „ოქროს ბურთის” მოგების ორი კი არა, ერთი კონკურენტი გყავთო. ჰოლანდიელმა აშკარად სარკასტულად იხუმრა:
„რა, რონალდუ ჩემი კონკურენტი იყო?”
აი, ეს პასუხი ვერ აიტანა კრიშტიანუ რონალდუს დამ, კატია ავეირუმ და სოციალურ ქსელში ვან დაიკს ასეთი პოსტი მიუძღვნა:
„ძვირფასო ვირჯილ, სადაც შენ მიდიხარ იქ კრიშტიანუ რონალდუ ათასჯერ ყოფილა და დაბრუნებულა.
იცი, რა, ჩემო ძვირფასი ვირჯილ, კრიშტიანუ რონალდუ სამჯერ იყო ჩემპიონი იმ ქვეყანაში, სადაც შენ უკვე წლებია თამაშობ და ჯილდოსთვის ჯერ თითიც ვერ მიგიდია. ვირჯილ, კრიშტიანუ რონალდუ მაგ ქვეყანაში საუკეთესო მოთამაშე და ბომბარდირიც კი იყო. სხვათაშორის, მე მაშინ იმაზე ახალგაზრდა ვიყავი დღეს შენ რომ ხარ.
შემდეგ, ძვირფასო ვირჯილ, კრიშტიანუ რონალდუ სხვაგან წავიდა და „კლუბესიტოს” ისტორიაში უდიდესი ფეხბურთელი გახდა. მადრიდის „რეალზე” გეუბნები ვირჯილ, ეს სახელწოდება გეუბნება რამეს? ალბათ გეუბნება, ყმაწვილო, რადგან ამ კლუბმა, კრიშტიანუსთან ერთად, ჩემპიონთა ლიგის ფინალში დაგამარცხა. ვირჯილ, ეს ის თასია რომელიც რონალდუმ ხუთჯერ მოიგო.
შემდეგ, ამ ბიჭმა, რონალდუმ და მისმა თანაგუნდელებმა ფინალში (სავარაუდოდ, ერთა ლიგის ფინალი იგულისხმება, სადაც პორტუგალიამ ჰოლანდიას 1:0 მოუგო) შენი „ნარინჯისფერები” გაანადგურეს. ძნელი გადასატანი იყო ვირჯილ? ვწუხვარ.
და, ჩემო ძვირფასო ვირჯილ, თავისი კარიერის ერთ-ერთ ყველაზე ცუდ პერიოდში კრიშტიანუ რონალდუმ მაინც შენზე მეტი ტიტული მოიპოვა. შთამბეჭდავია არა?
ახლა კი, ვირჯილ, შენ ჯერ მართლა ღისეულთა შორის უნდა მოიგო ტიტულები და როდესაც ბევრი დაგიგროვდება, მაშინღა მოგეცემა კრიშტიანუ რონალდუსთან ერთად მაგიდასთან დაჯდომის ნებართვა”.
ბოლოს კატია ავეირუ წერს, რომ მისი აზრით კრიშტიანუ ყოველთვის მსოფლიოს საუკეთესო ფეხბურთელი იყო.
