ევროლიგის მოქმედი ჩემპიონი და ევროპის ერთ-ერთი საუკეთესო გუნდი ესპანეთის პატარა ქალაქ ვიტორიაში დაეცა. მოსკოვის ცეესკა ბასკონიასთან 70:80 დამარცხდა და ამ საქმეში ლომის წვლილი თორნიკე შენგელიამ დაიდო.
საქართველოს ნაკრების 28 წლის კალათბურთელმა თავი ყველაზე კრიტიულ და საჭირო დროს გამოიჩინა, როდესაც მატჩის დასრულებამდე წუთით ადრე დაცვაში ნაყოფიერად გაისარჯა, საკუთარ ფარზე ბურთი მოხსნა და რუსთა კალათს შედეგიანად შეუტია. ამ ეპიზოდამდე, „ბასკონია“ წინ 4 ქულით იყო და არმიელთა წელში გადასატეხად გარდამტეხი სწორედ ეს მონაკვეთი აღმოჩნდა.
„ბასკონიას“ ლიდერი და კაპიტანი, რა თქმა უნდა, სასტარტო ხუთეულში იყო და პარკეტზე ჯამში 32 წუთზე მეტი დაჰყო. თორნიკე შენგელიამ თავი 22 ქულით გამოიჩინა, თუმცა ორმაგი დუბლი ვეღარ გაახერხა და 6 მოხსნა დააგროვა. თოკო, მატჩის საუკეთესო მოთამაშედ დასახელდა, მაგრამ არ არის გამორიცხული ჩვენებური ევროლიგის მე-9 ტურის უძვირფასეს კალათბურთელადაც აღიარონ.
„ბასკონია“ 4 მოგებით და 5 მარცხით ჯერჯერობით მე-10 ადგილზეა და ფლეი ოფში მოხვედრის შანსი არ დაუკარგავს. მომდევო ტურში, 22 ნოემბერს, „ბასკონია“ კვლავ შინაურ კედლებში სანქტ-პეტერბურგის „ზენიტს“ უმასპინძლებენ.
