კვირას „ლივერპული” – „სიტია” ანუ არსებობს საშიშროება, რომ მერსის პირას ჩასულ მანჩესტერელებს ადგილობრივი ცხელთავიანები ავტობუსს დაუმტვრევენ. თუმცა, ავტობუსს ვინ ჩივის… შესაბამისად, ინგლისის ჩემპიონი პოლიციისგან განსაკუთრებულ დაცვას ითხოვს.
„ქალაქელებს” სიფრთხილის საბაბი ნამდვილად აქვთ: სოციალურ მედიაში უკვე დაიპოსტა მუქარის არაერთი წერილი. „სიტის” ხელმძღვანელები დაუკავშირდნენ კიდეც ლივერპულელ კოლეგებს — კარგად მოიფიქრეთ, როგორ უნდა დაგვიცვათო.
შეგახსენებთ წინაისტორიას: 2018 წლის აპრილში „ლივერპული” და „მანჩესტერ სიტი” ჩემპიონთა ლიგის მეოთხედფინალში შეხვდნენ ერთმანეთს. ავტობუსს, რომელსაც პეპ გვარდიოლა და მისი გუნდი მიჰყავდა „ენფილდ როუდისკენ” თავს ბრბო დაესხა და ბოთლები, სანთებელები, ქვები და მაშხალები დაუშინა.
ინციდენტმა ათასობით გირვანქის ზარალი მოიტანა. „სიტის” „ენფილდიდან” შინ დასაბრუნებლად სხვა ტრანსპორტის დაქირავება დასჭირდა. შეხვედრა დასრულდა 3:0 „ლივერპულის” სასარგებლოდ, ორი მატჩის ჯამში კი მერსისაიდელებმა 5:1 აჯობეს მეტოქეს.
მაშინ, „ლივერპულის” მწვრთნელმა იურგენ კლოპმა „ქალაქელებს” ბოდიში მოუხადა და თავდამსხმელებს სულ იდიოტები ეძახა, პოლიციას კი არავინ დაუკავებია.
„ლივერპული” და „სიტი” შარშან შემოდგომაზეც შეხვდნენ ერთმანეთს „ენფილდ როუდზე”. პრემიერლიგის თამაში 0:0 დასრულდა. მუქარები ამ შეხვედრის წინაც იყო, მაგრამ საბედნიეროდ არაფერი მომხდარა.
