სულ მალე საჩოგბურთო სამყარო ლონდონში გაერთიანდება. სეზონის დამაგვირგვინებელი, ერთი-ერთი ყველაზე პრეტიჟული და სერიოზული ტურნირი კარს მოგვადგა.
10 ნოემბრიდან ინგლისის დედაქალაქში ვაჟთა შორის შემაჯამებელი შეჯიბრი იღებს სტარტს, სადაც სეზონის მანძილზე ნაჩვენები შედეგების და დაგროვილი ქულების მიხედვით გამოვლენილი 8 საუკეთესო მეჩოგნე მაქსიმუმს გაიღებს იმისთვის, რომ სეზონი წარმატებით დაასრულოს.
შარშან ყველას ალექსანდრე ზვერევმა აჯობა. რა თქმა უნდა, რუსი წარმოშობის გერმანელი ჩოგბურთელის საშემსრულებლო ოსტატობაში ეჭვი არავის ეპარება, მაგრამ მის გაჩემპიონებას სპეციალისტები ნაკლებად ვარაუდობდნენ. თანაც ზვერევს ფინალში მეტოქედ დიდი სლემების 16-გზის გამარჯვებული ნოვაკ ჯოკოვიჩი ჰყავდა.
ზვერევი ლონდონში წლეულსაც იქნება, თუმცა რთული სათქმელია რამდენად მიიჩნევა ის ტურნირის ფავორიტად. ჩოგბურთში, ამა თუ იმ შეჯიბრის მოგება ერთია, მაგრამ მომდევნო წელს იგივეს გამეორება, გაცილებით ძნელი.
ვაჟთა შორის შემაჯამებელი საჩოგბურთო ტუნრირი 1970 წელს დაარსდა და იქიდან მოყოლებული არც ყოფილა შემთხვევა მას უდებიუტანტოდ ჩაევლო. წლევანდელი შეჯიბრი კი ამ მხრივ მართლაც გამორჩეულია, რადგან მას ერთბაშად სამი მეჩოგნე დააჭაშნიკებს. ლონდონში სტეფანოს ციციპასი, მატეო ბერეტინი და დანილ მედვედევი პირველად ითამაშებენ.
წილისყრაზეც ვთქვათ. ქალთა ანალოგიური ტურნირისგან განსხვავებით, ვაჟებში ჯგუფები არა ფერების, არამედ წარსულში გამოჩენილი ჩოგბურთელების მიხედვით იყოფა. ამჯერად, მოთამაშეები ანდრე აგასის და ბიორნ ბორგის ჯგუფებში გადანაწილდნენ. პირველიში თავი მოიყარეს რაფაელ ნადალმა, სტეფანოს ციციპასმა, დანილ მედვედევმა და ალექსანდრე ზვერევმა, მეორეში – როჯერ ფედერერმა, ნოვაკ ჯოკოვიჩმა, დომინიკ ტიმმა და მატეო ბერეტინიმ.
