2019 წლის ფიფას საუკეთესო ფეხბურთელის სამ ნომინანტს შორის იყვნენ ლეო მესი, ვირჯილ ვან დაიკი და კრიშტიანუ რონალდუ. გაიმარჯვა მესიმ, მაგრამ გაჩნდა კითხვა: იქნებ ვან დაიკი უფრო იმსახურებდა?
ესპანურმა „მარკამ” თავის ორ ჟურნალისტს მისცა საშუალება გამოეთქვათ მოსაზრება ამ საკითხთან დაკავშირებით. როგორც მიხვდით, ერთი ამტკიცებს, რომ არგენტინელი დამსახურებულად გახდა წლის საუკეთესო, მეორეს აზრით კი ჯილდო ჰოლანდიელს ეკუთვნოდა. გავეცნოთ ამ მოსაზრებებს.
ხაიმე რინკონი: ლა ლიგაში, სამეფო თასსა და ჩემპიონთა ლიგაში ლეო მესიმ 49 შეხვედრაში 51 გოლი გაიტანა. გარდა ამისა, მან შეასრულა 21 საგოლე პასი. მესი გახდა არა მხოლოდ „ოქროს ბუცის” მფლობელი, არამედ ჩემპიონთა ლიგის საუკეთესო ბომბარდირიც.
არსებობს, გოლებზე ობიექტური და მნიშვნელოვანი სტატისტიკა? ეს კამათი ყოველ წელიწადს თავიდან იწყება და მე სულ ერთსა და იმავეს ვიმეორებ.
დიახ, გუნდურ ტიტულებს კოლექტივი იგებს, მაგრამ არსებობს ისეთი ჯილდოები, როგორებიცაა ფიფას საუკეთესო ფეხბურთელი და „ოქროს ბურთი”. აქ მოთამაშეებს ინდივიდუალური შედეგების მიხედვით აჯილდოებენ და შეიძლება ვინმეს არ მოსწონდეს, მაგრამ ამ თვალსაზრისით მესი აშკარად საუკეთესო იყო.
ალვარო როკა: მესის მორიგი მესური სეზონი ჰქონდა. ორი აზრი არ არსებობს, რომ ის იყო თავისი გუნდის და ლა ლიგის საუკეთესო ფეხბურთელი, მაგრამ რამდენადაც ვიცი ფეხბურთი სპორტის ინდივიდუალური სახეობა არ არის. გაპარტახება „ენფილდზე”, მარცხი „სამეფო თასის ფინალში” და უსახური გამოსვლა „კოპა ამერიკაზე” — ამ სამ ფაქტორს გადაწყვეტილებაზე გავლენა უნდა მოეხდინა.
ნებისმიერ სხვა ფეხბურთელს ასეთი სამი ჩავარდნა რომ ჰქონოდა, წლის საუკეთესოობას არავინ აღირსებდა.
მესი რომ თავის გუნდს ქაჩავს ისე ვერავინ აკეთებს, მაგრამ „ბარსელონა” საბოლოოდ მივიდა იქ, სადაც მივიდა.
მეორე მხრივ, არის ვირჯილ ვან დაიკი, „ლივერპულის” საუკეთესო მოთამაშე პრემიერლიგაში, რომელმაც თავისი გუნდი ჩემპიონთა ლიგაში გამარჯვებამდეც მიიყვანა.
გულწრფელად მიმაჩნია, რომ ამ ფაქტორებს სასწორი ვან დაიკის სასარგებლოდ უნდა გადაეხარა.
