წინა უქმეებზე ავტორბოლის მოყვარულთა ყურადღება უსათუოდ სინგაპურისკენ იქნებოდა მიპყრობილი. იქ მორიგი გრან პრის გათამაშება გაიმართა, რომელიც სებასტიან ფეტელმა მოიგო.
ფორმულა 1-ის 32 წლის გერმანელი პილოტისგან ეს არავის უკვირს. ფეტელი, თავისი შთამბეჭდავი კარიერის მანძილზე მსოფლიო ჩემპიონის 4 ტიტულით იწონებს თავს, ხოლო გრან-პრიზე გამარჯვებებს ვინღა მოთვლის. ამიტომაც, სინგაპურის რბოლაშიც გამოცდილი პილოტი უმთავრეს ფავორიტად მიიჩნეოდა და არც მან გაუცრუა ქომაგს იმედი.
სებასტიან ფეტელი „ფერარის“ გუნდის წევრია. სპეციალისტების ყურადღებაც სწორედ ამ ფაქტმა მიიქცია. საქმე იმაშია, რომ „ფერარის“ მრბოლელებს, ბოლო 11 წლის განმავლობაში, გრან პრი 3-ჯერ არასდროს მოეგოთ, წლეულს კი შეძლეს. ფეტელამდე, ბელგიის და იტალიის რბოლები შარლ ლეკლერმა დაასრულა „ფერარის“ სასარგებლოდ.
2008 წელს, დიდმა კიმი რაიკონენმა და ფელიპე მასამ, რომლებიც „ფერარის“ გუნდში ირიცხებოდნენ, მალაიზიაში, ბაჰრეინში, ესპანეთსა და თურქეთში ზედიზედ 4-ჯერ შეძლეს გრან პრიზე ეჩემპიონათ.
მიუხედავად სინგაპურში გამარჯვებისა, სებასტიან ფეტელმა პირად ჩათვლაში მეხუთე ადგილზე მაღლა ვერ აიწია. ზემოთ ნახსენები ლეკლერი მესამე პოზიციაზეა, ხოლო პირველობას არავის უთმობს „მერსედესის“ პილოტი ლუის ჰამილტონი.
