ჩემპიონთა ლიგაში წუხელ ბევრი ისეთი მატჩი შედგა, „ზალცბურგი“-„გენკის“ შედეგიც კი ნაკლებად დააინტერესებდა ფეხბურთის გურმანს.
არადა, დღის გმირი სწორედ ამ დაპირისპირებამ შვა. „ზალცბურგი“ ჩემპიონთა ლიგის ჯგუფურ ეტაპზე ბოლოს 1994 წელს მოხვდა და ახლა 25 წლის განმავლობაში ნაგროვები ემოცია ავსტრიელებმა ბელგიურ „გენკს“ ცუნამივით დაატეხეს თავს – 6:2.
მასპინძლებმა სულ 13-ჯერ დაარტყეს ზუსტად კარის ჩარჩოში და აქედან პირველივე გოლად მაშინ აქციეს, წამმზომი მეორე წუთს რომ ითვლიდა – „ზალცბურგის“ 19 წლის ფორვარდმა ერლინგ ჰოლანდმა ერთი გოლი არ იკმარა და ტაიმის დასრულებამდე ჰეთ-თრიქი გაიფორმა. ის უკვე შევიდა ისტორიაში, როგორც ჰეთ-თრიქის მესამე ყველაზე ახალგაზრდა ავტორი ჩემპიონთა ლიგაში. ლიგაში მასზე უმრწმესს იგივე მხოლოდ რაულმა და უეინ რუნიმ გაახერხეს.
ერლინგი ალფ-ინგე ჰოლანდის შვილია, რომელიც ინგლისურ „ნოტინგემში“, „ლიდსში“ და „სიტიში“ თამაშობდა. ალფ-ინგეს კარიერა როი კინთან საბედისწერო შეჯახებისას მიღებული ტრავმით დასრულდა. ერლინგი ინგლისში, იორკშირის საგრაფოში დაიბადა, მაგრამ თავს წმინდა წყლის ნორვეგიელად თვლის.
უკვე ჰქონდა დებიუტი ეროვნულ ნაკრებში, 20-წლამდელების მსოფლიო ჩემპიონატზე კი მაისში ჰონდურასს ერთბაშად 9 გაუტანა. ამ სეზონში ერლიმგ ჰოლანდს ფანტასტიური სტატისტიკა აქვს. ავსტრიის ლიგაში, ავსტრიის თასზე და ჩემპიონთა ლიგაში გამართულ 9 შეხვედრაში მის ანგარიშზე 17 გოლი, აქედან 4 ჰეთ-თრიქია.
ამოცანა გვეკითხება: რამდენ ხანს დატოვებენ ევროპული ბობოლა კლუბები ერლინგ ჰოლანდს ავსტრიაში?
