ლა ლიგაში ხელფასების ყველაზე დიდი ლიმიტი „ბარსელონას” აქვს. კატალონიელებმა ეს მაჩვენებელი შარშანდელთან შედარებით 38,52 მილიონი ევროთი გაზარდეს — 632,9 მილიონიდან 671,42 მილიონამდე.
რა დიდი მიხვედრა უნდა, რომ მეორე ადგილზე „რეალია”. მადრიდელთა ლიმიტი 641 მილიონ ევროს უდრის. შარშანდელთან შედარებით მათაც 74,55 მილიონით გააუმჯობესეს მდგომარეობა.
მესამე კი „ატლეტიკოა” — 384,5 მილიონი. „მატრასები” სულ უფრო და უფრო უახლოვდებიან „ბარსას” და „რეალს”. ადრე მათი ლიმიტი 322,92 მილიონი ევრო იყო.
ზოგადად, უნდა ითქვას, რომ ლა ლიგაში ხელფასები იზრდება. ბოლო ერთ წელიწადში ორად ორმა გუნდმა ვერ მოახერხა ლიმიტის გაზრდა. ეს გუნდებია „ვილიარეალი” და „ლეგანესი”. მათ ლიმიტი შეუმცირდათ.
ყველაზე დაბალი სახელფასო ლიმიტი კი სამ კლუბს აქვს: „გრანადას” — 35,46 მილიონი, „ვალიადოლიდს” — 32,03 მილიონი და „მალიორკას” — 29,96 მილიონი.
ზემოთ ჩამოთვლილ თანხებში ფეხბურთელთა გასამრჯელოს გარდა შედის მწვრთნელების, მათი თანაშემწეების, აკადემიის თანამშრომელთა და სხვათა გასამრჯელოები. აქვე ფიქსირებულ ჯამაგირთა გარდა გათვალისწინებულია სხვადასხვა სოციალური დაზღვევა, პრემიები, აგენტების წილი და ა.შ.
ყოველი კლუბი შემოსავალს აკლებს სტრუქტურულ ხარჯებს და ასე ანგარიშობს ხელფასის ლიმიტს. შემდეგ, ლა ლიგის საგანგებო ფინანსური კომიტეტი მათ მიერ წარდგენილ რიცხვებს ამოწმებს და ამტკიცებს, რათა ხელფასების ზრდას გამოდევნებულ კლუბებს სტაბილურობა არ დაერღვეთ.
ცხადია, ყველა კლუბი ცდილობს ხსენებულ კომიტეტს მაქსიმალური ლიმიტი დაამტკიცებინოს და მის გაზრდას ფეხბურთელების გაყიდვით შემოსული თანხებითაც ახერხებს.
