ერთი თვე შესრულდა, რაც პრემიერლიგა დაიწყო. არაფერი არალოგიკური და არაპროგნოზირებადი – ტიტულის მთავარი მაძიებლები ლივერპული და მანჩესტერ სიტი კვლავაც დომინირებენ და ტიტულისთვის იბრძვიან, დიდი ექვსეულის გუნდები კი პოზიციებს ნელ-ნელა იმყარებენ.
სანაკრებო პაუზისას, პრემიერლიგის ვებ-გვერდი გასულ თვეს აჯამებს და საუკეთესო ფეხბურთელებსა თუ მწვრთნელებს ავლენს.
გამოქვეყნდა იმ ფეხბურთელთა სია, რომლებიც თვის საუკეთესოს წოდებისთვის იბრძოლებენ.
სერხიო აგუერო – 6 ბურთი შეაგდო, ერთხელ თანაგუნდელსაც გაატანინა და ბომბარდირთა დავას სათავეში უდგას.
რაჰიმ სტერლინგი – წინა სეზონის ერთ-ერთი საუკეთესო ფეხბურთელი და ახლაც წარმატებით გამოდის და 5 გოლის გატანაც მოახერხა.
კევინ დე ბრუინი – 6-ეულში მყოფი მოქმედი ჩემპიონის კიდევ ერთი ფეხბურთელია, რომელიც საუკეთესო ასისტენტის ჯილდოსკენ დამაჯერებლად მიიწევს. რომ არა მძიმე ტრავმები, წლინახევრის წინ ბელგიელი ტიერი ანრის რეკორდსაც მოხსნიდა, თუმცა ამის მშვენიერი შანსი ამ სეზონში აქვს – ოთხ ტურში 5 საგოლე გადაცემა და ერთი გოლიც.
რობერტო ფორმინო – ვიცე-ჩემპიონ „ლივერპულს“ წარმოადგენს, ვინაც 2 გოლი გაიტანა, ამდენჯერვე თანაგუნდელები ახეირა და ქულათა მაქსიმუმის აღებაში ერთ-ერთი უმთავრესი კაცია.
ტიმუ პიუკი – ფინელი თავდამსხმელი, რომელიც წინა სეზონში ჩემპიონშიფის საუკეთესო ბომბარდირი გახდა, ახლა კი ალღო პრემიერლიგასაც აუღო და მეტოქეებს 5 გოლი გაუტანა. ნორვიჩის ლიდერმა 1 საგოლე პასიც გააკეთა.
რაც შეეხება მწვრთნელებს, რა გასაკვირია რომ ოთხივე მატჩის მომგები იურგენ კლოპი და მეორეადგილოსანი დაუმარცხებელი „სიტის“ მესვეური პეპ გვარდიოლა სიაში არიან. აქვეა, კარგად ნაცნობი ბრენდან როჯერსი, რომელიც „ლესტერთან“ ერთად მორიგი სასწაულის მოხდენას აპირებს და 8 ქულით მელიები მესამე ადგილზე ჰყავს.
და ბოლოს, როი ჰოჯსონი, ინგლისურ კლუბებთან ერთად და ნაკრებიც რომ გაუწვრთნია, ახლა კი კარიერას „კრისტალ პალასში“ აგრძელებს. მისმა გუნდმა ერთადერთი შეხვედრა წააგო, 7 ქულა აიღო, „მანჩესტერსაც“ სძლია და ოთხეულშია.
გამარჯვებულებს ჯერ ოცივე კლუბის კაპიტანი და საფეხბურთო ექსპერტი, 9 სექტემბრის მერე კი ფეხბურთის გულშემატკივარი გამოავლენს.
