ჰარი კეინმა, მყვინთავი არ ვარო. მყვინთავს ინგლისში სიმულიანტს ეძახიან, მსაჯის მოსატყუებლად საჯარიმოში რომ წაიქცევა მაშინ, როდესაც მოწინააღმდეგეს წესი არ დაურღვევია.
ლაპარაკია „არსენალსა” და „ტოტენჰემ ჰოთსპურს” შორის გამართულ ჩრდილოლონდონურ დერბიზე, რომელიც 2:2 დამთავრდა. ამ შეხვედრის 85-ე წუთზე იყო ეპიზოდი, როდესაც არსენალელი სოკრატისმა კეინი თითქოს წააქცია, მაგრამ პენალტი არ დაინიშნა.
ინგლისელ მიმომხილველთა უმეტესობამ „სფურზისა” და ნაკრების ფორვარდს მყვინთავობა დასწამა. გარი ნევილმა, მაგალითად, თქვა, რომ კეინს იმთავითვე პენალტის მონადირება ჰქონდა ჩაფიქრებული.
გრემ სუნესმა ბრძანა: „მეც ვფიქრობ, რომ კეინი პენალტზე წავიდა. წასაქცევად ხელსაყრელ მომენტს ელოდა. მცველი ზურგზე ხელით მართლაც შეეხო, მაგრამ საპენალტე ამ ეპიზოდში არაფერი იყო”.
ჯეიმი რედნაპი: „ჰარის პენალტი უნდოდა. ის სხეულს ისევე კარგად ფლობს, როგორც ნებისმიერი გამოცდილი თავდამსხმელი”.
აზრი ჰკითხეს ჟოზე მოურინიუსაც. „განსაკუთრებულმა” უპასუხა: „გაცილებით უმიზეზო პენალტებიც მინახავს, მაგრამ თერთმეტმეტრიანი არც ამ ეპიზოდში უნდა დანიშნულიყო”.
თავად კეინმა, რომელსაც შეხვედრის პირველ ტაიმში უკვე ჰქონდა პენალტი გატანილი და ის ჩრდილოლონდონურ დერბიში მისი მეათე გოლი გახლდათ, თქვა:
„მცველი დაღლილი იყო და არაქათგამოცლილი შემოვიდა ორთაბრძოლაში. ეს რომ სადმე მოედნის ცენტრში მომხდარიყო, მსაჯი დაუსტვენდა, მაგრამ საჯარიმოში პენალტის დანიშვნა ვერ გაბედა. ვფიქრობ, იგივე დაემართა ვიდეორეფერისაც. ეპიზოდი 50-50 იყო”.
