შაბათს, 3 აგვისტოს, თბილისის სპორტის სასახლეში იწყება 17 წლამდელ გოგონათა ევროპის ჩემპიონატი. ის 11 აგვისტომდე გასტანს. შეჯიბრებაში 10 გუნდი მონაწილეობს:
A ჯგუფი: სერბეთი, ბულგარეთი, უკრაინა, საბერძნეთი, ფარერები;
B ჯგუფი: ლიეტუვა, ფინეთი, შვეეიცარია, საქართველო, ლატვია;
საქართველოს ნაკრების კალენდარი ასეთია: 3 აგვისტოს საქართველო – ლიეტუვა; 4 აგვისტოს საქართველო – ფინეთი; 5 აგვისტოს საქართველო – ლატვია; 8 აგვისტოს შვეიცარია – საქართველო.
ჯგუფურ ეტაპზე ჩვენი ნაკრების ყოველი თამაში 16 საათზე დაიწყება. ერთადერთი მატჩი, რომლის დასაწყისიც 16 საათსა და 30 წუთზეა დათქმული, იქნება პირველი შეხვედრა ლიეტუვასთან, რომელსაც წინ ჩემპიონატის გახსნის ხანმოკლე ცერემონიალი წარუძღვება.
შეჯიბრების პირველი ეტაპის შემდეგ ანუ მას მერე, რაც გუნდები A და B ჯგუფებში ადგილებს გაინაწილებენ, გაიმართება ფლეი-ოფის შეხვედრები, რის შედეგადაც ჩემპიონატის ათივე პოზიციას თავისი მფლობელი გამოუჩნდება.
ფინალი თბილისის სპორტის სასახლეში 11 აგვისტოს 18 საათზე გაიმართება.
კითხვაზე, რით არის კარსმომდგარი ჩემპიონატი საქართველოს გოგონათა ნაკრებისთვის მნიშვნელოვანი, გუნდის მწვრთნელმა, ინა ჭკუასელმა უპასუხა:
„ხელბურთი ევროპაში სპორტის ძალიან პოპულარული სახეობაა. იმედი მაქვს, რომ ეს ჩემპიონატი საქართველოში ქალთა ხელბურთის განვითარებაში დაგვეხმარება. ჩვენთვის, როგორც მასპინძელი გუნდისთვის ამ შეჯიბრებას დიდი მნიშვნელობა აქვს. საოცარი პატივია წარსდგე საკუთარი გულშემატკივრის წინაშე, ამასთანავე ამ თამაშებს დიდი მნიშვნელობა აქვთ ახალგაზრდა ხელბურთელების განვითარებისა და ოსტატობის ასამაღლებლად. საქართველოს ნაკრები თითოეული მატჩისთვის მაქსიმუმს გაიღებს. გულშემატკივარს ბოლომდე ბრძოლას ვპირდებით, რაც მწამს დადებით შედეგამდე მიგვიყვანს. ჩემპიონატამდე რამდენიმე თვით ადრე მოვახერხეთ 17 წლამდელთა ოპტიმალუტრი შემადგენლობის შეკრება. გარკვეული პერიოდის განმავლობაში გვეხმარებოდნენ სერბეთიდან და საბარძნეთიდან მოწვეული კოლეგები. ჩვენ ერთად გავიარეთ წინასაჩემპიონატო სამზადისი, რითაც კმაყოფილები ვართ”.
და ბოლოს, თამაშებზე დასწრება უფასოა.
