გარეთ ბეილი ისტორიულ წინადადებას განიხილავს — მას შეუძლია გახდეს ფეხბურთის ისტორიაში პირველი მოთამაშე, რომელიც კვირაში მილიონ გირვანქას მიიღებს. მილიონი გირვანქა 1,25 მილიონ დოლარს ან 1,1 მილიონ ევროს უდრის.
ყველაფერი კი „რეალის” მწვრთნელის ზინედინ ზიდანის განცხადებას მოჰყვა. ფრანგმა თქვა, ბეილი მადრიდიდან რაც მალე წავა, მით უკეთესი იქნებაო და სიტყვა დასრულებული არ ჰქონდა, რომ ჩინური სუპერლიგის კლუბმა „ბეიჯინგ გუოანმა” ფეხბურთელს ფენომენალური წინადადებით მიმართა. მიაქციეთ ყურადღება: „სანის” ინფორმაციით, ლაპარაკია „ხელზე” ასაღებ თანხაზე! ანუ, ეს მილიონი დაქვითვისგან თავისუფალია.
ზიდანის ნათქვამზე ჩინელებისგან განსხვავებული რეაქცია ჰქონდა ბეილის აგენტ ჯონათან ბერნეტს, რომელმაც „რეალის” თავკაცის სიტყვას სამარცხვინო უწოდა. ზიდანმა უელსელი „ბაიერნთან” ამხანაგურ შეხვედრაში არ ათამაშა. 30 წლის თავდამსხმელი ტრიბუნიდან ადევნებდა თვალს, როგორ წააგეს მისმა თანაგუნდელებმა 1:3.
„სანი” წერს, რომ ზიდანი და ბეილი ორი წელიწადია არ დალაპარაკებიან ერთმანეთს. ფრანგმა თქვა:
„ბეილი „ბაიერნთან” იმიტომ არ ვათამაშე, რომ კლუბი მის გაყიდვაზე მუშაობს. ვნახოთ, უახლოეს დღეებში რა მოხდება. იქნებ ხვალაც კი გადავიდეს სხვა გუნდში და თუ ეს მოხდება, ძალიან კარგი იქნება.
იმედი ვიქონიოთ, რომ ბეილი რაც შეიძლება მალე წავა სხვაგან. ეს ყველასთვის უკეთესი იქნება”.
როგორც ზემოთ მოგახსენეთ, ჯონათან ბერნეტმა ზიდანის სიტყვებს მძაფრად უპასუხა. მან თქვა:
„ზიდანის მხრიდან ასე ლაპარაკი ადამიანზე, რომელმაც „რეალისთვის” ამდენი გააკეთა, სამარცხვინოა. თუკი გარეთი წავა, ეს იმიტომ მოხდება, რომ თავად მას ასე აწყობდა და არა იმიტომ, რომ ზიდანმა გააგდო გუნდიდან”.
