ამერიკულმა მედიამ MLS-ის კლუბების ბიუჯეტი და მათი ფეხბურთელების ჯამაგირი გამოარკვია.
თურმე, სან ხოსეში, სადაც ორი ქართველი ირიცხება, ყველაზე მაღალშემოსავლიანი ფეხბურთელი ვაკო ყაზაიშვილია. საქართველოს ნაკრების შემტევი ყოველწლიურად 1 475 004 დოლარს იღებს. 25 წლის ქართველი ნახევარმცველი ასევე ერთადერთია კლუბში, ვისი ხელფასიც მილიონზე მეტია.
ყაზაიშვილს, თვით კლუბის ლეგენდასა და MLS-ის ახლალგამომცხვარ საუკეთესო ბომბარდირ კრის ვონდოლოვსკიზე მეტი აქვს. ვონდოლოვსკი წელიწადში 800 000-ს იღებს.რაც შეეხება სან ხოსეს მეორე ქართველს, გურამ კაშიას ანაზღაურება „სულ“ 500 ათასი არის.
ჩემპიონატის მასშტაბით ყველაზე მსუყე შემოსავალი ზლატან იბრაჰიმოვიჩს აქვს. ვეტერან შვედს გალაქსი 7.2 მილიონს უხდის. ათეულში ევროპულ ბურთაობას მობეზრებული ბასტიან შვაინშტაიგერი, ჯოვანი დოს სანტოსი, კარლოს ველა და უეინ რუნიც არიან.
აქვე ვთქვათ, რომ ნაკრებს მიღმა დარჩენილმა ვაკო ყაზაიშვილმა თასზე, საკრამენტოსთან (4:3) მოგებულ შეხვედრაში დუბლი გაიფორმა, კაშია კი განაცხადში არ ყოფილა – წინა დღით ცენტრალური მცველი ნაკრებისთვის გაისარჯა.
