კონორ მაკგრეგორი მაგარი კაცია, ირლანდიური ხასიათით და ექსტრავაგანტული იმიჯით. ამ კაცმა თავისი ქცევებითა თუ სატელევიზიო გამოსვლებით შერეული საბრძოლო ხელოვნება ბევრ ადამიანს გააცნო და შეაყვარა კიდეც, თუმცა…
ერთია კონორი კამერასთან და მეორე კამერის მიღმა. რეალურად, 30 წლის სპორტსმენს კოლეგებთან არეულ-დარეული ურთიერთობა აქვს, რაც ამ სახეობისთვის ერთი შეხედვით დამახასიათებელია, თუმცა ირლანდიელის თავქარიანობამ მაკგრეგორი სპორტიდან წასვლაზე რამდენჯერმე დააფიქრა. ჯერ კიდევ 2016 წელს კონორმა თქვა, ხელთათმანებს ვდებ, წარმატებებს გისურვებთ, მადლობა სიყვარულისთვისო, თუმც ეს ურწმუნოს ფიცს უფრო ჰგავდა. მაკგრეგორი ოქტაგონს დაუბრუნდა და ლეგენდებს ერთმანეთის მიყოლებით ეჩხუბა…
ფლოიდ მეივეზერთან და ხაბიბ ნურმაგომედოვთან მარცხმა, სასამართლო სკანდალებმა და გაუპატიურების მცდელობაში ბრალდებებმა კონორს გონება აურია და სამიოდე თვის წინ სპორტიდან საბოლოოდ წასვლის გადაწყვეტილება მიიღო.
ამ განცხადების მერე, ჟურნალისტებმა კონორს ოქტაგონზე დაბრუნებისა და ახალი პარტნიორის შესახებ სიტყვა ვერ დააცდევინეს. მიუხედავად ამისა, ბრიტანელის მეტოქეებს და MMA-ს სამყაროს წევრებს კონორის დაბრუნების მაინც სჯერათ. მათ შორისაა UFC-ის პრეზიდენტი დანა ვაითი, რომელიც მაკგრეგორის საქმეში ხილვას უახლოეს თვეებშივე ელის.
„კონორის სიჩუმე მოჩვენებითია. მას უარი არცერთ ბრძოლაზე უთქვამს. ალი აბდელაზისს შეუძლია თქვას ის, რაც სურს, თუმცა კონორი არასდროს ნებდება და არც ერთი მეტოქის არ ეშინია. მჯერა, რომ ის ოქტაგონზე წლულსვე დაბრუნდება”, – ამბობს ვაითი.
ბოლოს მაკგრეგორმა შარშან ოქტომბერში ნურმაგომედოვთან იბრძოლა და ოთხ რაუნდში დამარცხდა, მერე კი დარბაზს მიღმა დაპირისპირება და ბრალდებათა კორიანტელი იყო…
