წინა უქმეებზე საფრანგეთში პირველი და მეორე ელიტური დივიზიონების მატჩები გაიმართა. ტოპ 14-ში ბოლოსწინა ტური შედგა, რომელმაც ბევრი ვერაფერი გაარკვია. მხოლოდ ის გაცხადდა, რომ „ლიონი“ პლეი-ოფში გავიდა, დანარჩენი ვაკანტური ადგილებისთვის კი ბრძოლა ბოლო ტურში მორჩება. 3 საგზურისთვის 4 გუნდი ომობს, მათ შორის 2 „ქართული“ – „რასინგი“ და „მონპელიე“.
პრო D2-ში კი პლეი-ოფის ნახევარფინალები გაიმართა. ფინალში „ბაიონი“ და „ბრივი“ გავიდნენ და ტოპ 14-ის პირდაპირ საგზურს გადამწყვეტი ჯახის მომგები მიიღებს, წაგებული კი „გრენობლს“ გადასასვლელ პლეი-ოფში შეერკინება. ქართველმრავალი „ბრივი“ „ბაიონს“ პოში 26 მაისს შეხვდება.
„ბაიონმა“ ფინალისტობა ოიონაში გამართულ ომში მიიღო. მასპინძელთა გუნდის მეორე ლელო ვეტერანმა ბორჯღალოსანმა ირაკლი მირცხულავამ მიითვალა, ვინც თანაგუნდელებთან ერთად მიეძალა მეტოქე დამცველებს და ბურთი ჩათვლის მოედანზე დაამიწა. თუმც, ქართველი ბურჯის საკმაოდ ძლიერმა გუნდმა ვერ შეძლო დიდი უპირატესობის შენარჩუნება და საბოლოოდ 34:38 დამარცხდა.
„ბრივმა“ კი შინ 40:20 „ვანს“ სძლია, რომელშიც ერთი საათი მარცხენა ბურჯად ნიკა ნეფარიძე იდგა. ბრიველებში იგივე პოზიციაზე ბოლო 23 წუთი ბორჯღალოსანმა კარლენ ასიეშვილმა ითამაშა, ხოლო ჩვენი ნაკრების ძირითადი 9 ნომერი ვასილ ლობჟანიძე მოედანზე დასკვნითი 17 წუთით შეუშვეს.
აი, ბორჯღალოსანი მესამეხაზელი ოთარ გიორგაძე კი სასტარტოში იყო და მორიგი ლელოც გაიტანა. ეს იყო ოთიას მე-7 ლელო მიმდინარე სეზონში და მეორე იმ დღეს ბრიველთა შორის. 45-ე წუთზე ახალგაზრდა ქართველმა გუნდის მრავალ ფაზიანი შეტევა დააგვირგვინა, ხოლო 53-ზე ვალმოხდილმა მინდორი დატოვა.
