უეფას სამსაჯო კომიტეტმა დაასახელა არბიტრი, რომელიც ჩემპიონთა ლიგის ფინალს მოემსახურება – „ლივერპული“- „ტოტენჰემის“ განსჯა სლოვენიურ ბრიგადას ანდეს კარგად ცნობილი დამირ სკომინას მეთაურობით. მას იურე პრაპროტნიკი და რობერტ ვუკანი დაეხმარებიან. მეოთხე მსაჯი ესპანელი ანტონიო მატეუ ლაოსი იქნება.
ვიდეოასისტენტების ბრიგადაში ჰოლანდიელები დანი მაკკელი და პოლ ვან ბუკელი, აგრეთვე გერმანელები ფელიქს ცვაიერი და მარკ ბორში შევიდნენ. ეს უკანასკნელი კონკრეტულად აუტებზე იქნება პასუხისმგებელი. დამირ სკომინასთვის ეს ჩემპიონთა ლიგის პირველი ფინალია, თუმცა გამოცდილება არ აკლია. 2017 წელს მან ევროპის ლიგის ფინალში „აიაქსი“-„მანჩესტერი“ განსაჯა, 2012 წელს კი ევროპის სუპერთასზე „ჩელსი“-„ატლეტიკოს“ დაპირისპირებასაც გაუძღვა.
ბარემ აქვე მოგახსენებთ, რიმ ლიგის ფინალზე ნომინალურ მასპინძლად „ტოტენჰემი“ ითვლებოდა, მაგრამ უსაფრთხოების ნორმებიდან გამომდინარე „ვანდა მეტროპოლიტალიტანოს“ ის გასახდელი, რომლითაც საშინაო მატჩებისას მადრიდის „ატლეტიკო“ სარგებლობს, „ლივერპულს“ ერგო. საქმე იმაშია, რომ ქომაგები საპირისპირო ტრიბუნებზე გაანაწილეს და გუნდებს პირიქით – მეტოქის ტრიბუნების ქვეშ გასახდელები ერგოთ, შესაბამისად, ერთმანეთის ფანების გავლით მოუწევდათ სტადიონზე შეღწევა.
რა დიდი მნიშვნელობა აქვს გასახდელს? „ატლეტიკოს“ გასახდელი და საშხაპე გაცილებით ფართო და კომფორტულია, ვიდრე სტუმრებისთვის განკუთვნილი. ამას გარდა, გასახდელს მოთელვისთვის განკუთვნილი ზონაც ახლავს. წვრილმანია, მაგრამ მაინც…
