ფორმულა 1-მა ჯერჯერობით მხოლოდ მეხუთე, ესპანეთის გრან-პრი მოილია, მაგრამ ინტრიგა უკვე მკვდარია.
ყველა რბოლაში დუბლი შეასრულეს გერმანული საჯინიბოს პილოტებმა ლუის ჰემილტონმა და ვალტერ ბოტასიმ. „ფერარის“ ლიდერი სებასტიან ფეტელი მხოლოდ მეოთხე ადგილს დასჯერდა. სეზონის სტარტზე იტალიელები იქადნებოდნენ, მანქანის ძრავში და აეროდინამიკაში ისეთი ცვლილებები შევიტანეთ, კონკურენციის არც კი გვეშინიაო. პირიქით კი აღმოჩნდა.სწორედ ბოლიდის აგრესიული აეროდინამიკური ფორმა იქცა იტალიელთა უმთავრეს პრობლემად, რომლის მოგვარებასაც ჩემპიონატის მსვლელობისას ცდილობენ. ეს ერთადერთი პრობლემა როდია: მოიკოჭლებს ტექნიკური ჯგუფი. პიტ-სტოპზე საბურავების შეცვლისას ფეტელსაც და ლეკლერსაც თანაბარი 4.4 წამი დაახარჯეს, რაც დასაშვებზე 0.2-0.3 წამით მეტია.
ეს დრო ფორმულას მასშტაბებში კატასტროფულად ბევრია. ვერც ხელმძღვანელობამ ივარგა. ჯერ, როცა ფეტელს შეექმნა საბურავების პრობლება, 10 წრე იფიქრეს და მერეღა მისცეს მითითება, თანაგუნდელი ლეკლერი გაეტარებინა.
ფინიშისკენ პირიქით მოხდა, ახლა ლეკლერს დაუგვიანეს მითითება, სიჩქარეაკრეფილი ფეტელი გაეტარებინა. შედეგად, მესამე ადგილიც დაიკარგა – „რედ ბულს“ დარჩა.
წლევანდელ სეზონს აღარაფერი ეშველება. არავითარი ინტრიგა: ლუის ჰემილტონს უკვე შეუძლია, იზეიმოს მორიგი ტიტული.
რა ეშველება „ფერარის“?
