ესპანური AS წერს, რომ 29 წლის გერმანელ ნახევარმცველ ტონი კროოსს „რეალიდან” წასვლა უნდა. ამბობენ, რომ მისი ბედი ერთ-ორ თვეში გადაწყდება. კროოსის წასვლა მადრიდშიც აწყობთ — გათავისუფლდება ადგილი და ხელფასი ორიდან ერთისთვის: კრისტიან ერიქსენისთვის ან პოლ პოგბასთვის. ერიქსენი და პოგბა ზინედინ ზიდანის სასურველ მოთამაშეთა სიიდან არიან.
კროოსი „რეალში” 2014 წელს გადავიდა და მას მერე ისეთი ცუდი სეზონი, როგორიც ახლა, 2018-19 წლებში აქვს, არ ჰქონია. ლეგენდარულმა გერმანელმა ვარსკვლავმა ბერნდტ შუსტერმა „ელ ტრანსისტორთან” ინტერვიუში თანამემამულეზე თქვა: „ამ ეტაპზე ის დიზელის ტრაქტორს ჰგავს, რახრახებს და სარგებელი არ აქვს”.
კროოსი რომ ცუდ ფორმაშია ყველაზე ნათლად „აიაქსთან” ჩემპიონთა ლიგის შეხვედრაში გამოჩნდა — მან 24-ჯერ დაკარგა ბურთი და 11 პასი არასწორად გადააწოდა. არადა, გერმანელი სწორედ ზუსტი პასებით არის ცნობილი.
აქამდე კროოსი „რეალის” ერთ-ერთ საუკეთესო მოთამაშედ ითვლებოდა, მაგრამ როგორც ჩანს ყველაფერს აქვს დასასრული. ახლა მადრიდელები შეთავაზებებს ელიან. უფრო გარკვევით რომ ვთქვათ, თუ სარფიან წინადადებას არ მიიღებს, „რეალი” გერმანელს უბრალოდ არ გაყიდის.
საინტერესოა, კიდევ გამოჩნდება თუ არა „მანჩესტერ იუნაიტედი”, რომელიც 2018 წლის ზაფხულში ცდილობდა მადრიდელებთან ყოფილ ბავარიელზე დალაპარაკებას.
