31 – კრისტალლიგა

ახალი პარტნიორი

1 მარტს, 19 საათზე, „მიხეილ მესხის“ მთავარ მოედანზე, მსაჯმა, კვირიკაშვილმა ჩასტვინა და საქართველოს რიგით 31-ე ჩემპიონატიც დაიწყო, რომელსაც ამიერიდან “კრისტალბეთ ეროვნული ლიგა“ ეწოდება. საქმე ის არის, რომ გაზაფხულის პირველივე დღეს, სფფ-სა და კომპანია კრისტალბეტს შორის ხელშეკრულება გაფორმდა, რომლის მიხედვითაც, სფფ ამ კომპანიისგან 2 მილიონ ლარს მიიღებს.

ეროვნული ლიგის მთავარი პარტნიორის  მხარდაჭერით, ახალი საფეხბურთო სეზონიდან  გულშემატკივრებს სხვადასხვა სიახლე ელოდება. „კრისტალბეთ ეროვნული ლიგის“ პოპულარიზაციისთვის, დაგეგმილია რამდენიმე ახალი პროექტი, მატჩების ტრანსლაცია „კრისტალბეთ ეროვნული ლიგის“ ინტერნეტ პლატფორმაზე კვლავ გაგრძელდება, პარალელურად კი შეხვედრების ნახვის შესაძლებლობა გულშემატკივარს საცდელი მაუწყებლობის რეჟიმში, საკაბელო ტელევიზიის „O2“-ს საშუალებით ექნება. ტურის ცენტრალური მატჩი, ტრადიციულად, საზოგადოებრივი მაუწყებლის პირდაპირ ეთერში გადაიცემა.

ჩემპიონი ჩემპიონის წინააღმდეგ

სეზონის პირველ მატჩში, მოქმედმა ჩემპიონმა, „საბურთალომ,“ ქვედა ლიგის გამარჯვებულ  ბათუმის „დინამოს“ უმასპინლა და 1:0 მოუგო. თუმცა, ალბათ, ფრე უფრო ლოგიკური შედეგი იქნებოდა.

პირველი ნახევარი სტუმრებისა იყო. მეტსაც უტევდნენ და რამდენიმე სახიფათო მომენტიც შექმნეს, მაგრამ ვერ გაიტანეს და ეს საკუთარ თავს უნდა დააბრალონ. შესვენების შემდეგ კი, ვითარება შეიცვალა, უკვე მასპინძლები დომინირებდნენ და აკი ბოლოსკენ თავიც გამოიჩინეს კიდეც. გოლი საბურთალოელთა ახალწვეულმა, 25 წლის ჩერნოგორიელმა, ოგნიენ როლოვიჩმა გაიტანა.

სასიხარულოა, რომ ბათუმელები ელიტას დაუბრუნდნენ. ზღვისპირელები ყოველთვის განსაკუთრებულ ელფერს სძენდნენ ხოლმე უმაღლეს ლიგას და იმედია, მომავალშიც ასე იქნება. მით უმეტეს, რომ ცოტა ხანში შესანიშნავ, 20 ათასიან სტადიონზე გადაინაცველებენ, სადაც ახლა გადახურვითი სამუშაოები მიმიდინარეობს.

„ტორპედოს“ ზედიზედ მეორე

ქუთაისის „ტორპედომ“ ახალ სეზონში ზედიზედ მეორე თამაში მოიგო. ჯერ იყო და, „საბურთალო“ დაამარცხა სუპერთასზე (1:0) და მიჯრით მეორედ დაეუფლა პრიზს. შაბათს კი შინ „სიონს“ სძლია, თუმცა ერთობ გაუჭირდა. კერკეტმა ბოლნისელებმა ორჯერ გაათანაბრეს ანგარიში და კახა ჩხეტიანის შგირდებმა მხოლოდ დამთავრებამდე 15 წუთით ადრე შეძლეს გამარჯვების ბურთის გატანა. თავი თორნიკე კაპანაძემ გამოიჩინა.

შესანიშნავი „ლოკომოტივი“

ყველაზე მეტი ბურთი პირველ ტურში თბილისის „ლოკომოტივმა“ გაიტანა. 4:1 მოუგო „რუსთავს“ და ცხრილის სათავეშიც დადგა. არადა, რკინიგზელები თავიდან აგებდნენ, სტუმართაგან თავი ზაზა ციცქიშვილმა გამოიჩინა. მაგრამ დავით ჯიქიამ, რატი არდაზიშვილმა, გუნდში დაბრუნებულმა ირაკლი სიხარულიძემ და რევაზ ინჯგიამ ოთხჯერ დააწყებინეს სტუმრებს თამაში ცენტრიდან.

პირველი დუბლი

კვირას, სეზონის წინ გვარიანად გადახალისებულმა „დინამომ,“ საკუთარ „დინამო არენაზე“ „ჩიხურა“ 2:0 დაამაცრცხა. ორივე გოლი დინამოელთა 23 წლის ნახევარმცველმა, ლევან შენგელიამ გაიტანა და სეზონის პირველი დუბლიც მიითვალა.

ამავე შეხვედრაში დაფიქსირდა პირველი გაძევებაც. მსაჯმა ვადაჭკორიამ, 33-ე წუთზე მინდვრიდან საჩხერელი დავით მაისაშვილი დაითხოვა.

კერკეტი ვეტერინარები

ზემოთ ბათუმის ელიტაში დაბრუნებაზე ვთქვით და იმავეს გავიმეორებთ „ვიტ ჯორჯიაზეც.“ ეს გუნდიც ყოველთვის ანგარიშგასაწევი ძალა იყო ჩვენს ჩემპიონატში. ორჯერ ტიტულიც მოუგია და ევროთასებზეც ხშირად უთამაშია. ამიტომ, ვიტყვით, რომ მცხეთელებიც „თავის“ ადგილზე დაბრუნდნენ. აკი პატარა მოულოდნელობაც მოახდინეს დებიუტშივე.  „დილას,“ გორში, ზურაბ მუსელიანის გოლით მოუგეს.

1 ტური

საბურთალო 1:0 ბათუმი, ტორპედო 3:1 სიონი, ლოკომოტივი 4:1 რუსთავი, დინამო 2:0 ჩიხურა, დილა 0:1 ვიტ ჯორჯია

სატურნირო ცხრილი

მე-2 ტური

5 მარტი: ლოკომოტივი – საბურთალო, ბათუმი – ტორპედო

6 მარტი: სიონი – დინამო, რუსთავი – ვიტ ჯორჯია, ჩიხურა – დილა