წარსულში ცნობილი ინგლისელი თავდამსხმელის ალან შირერის ბლოგში „მანჩესტერ იუნაიტედისა” და „ლივერპულის” პრემიერლიგური შეხვედრის (0:0) შემდეგ მერსისაიდური გუნდი გვარიანდ გახლავთ გაკრიტიკებული. შირერი წერს:
„თუ „ლივერპული” ვერც ამჯერად გახდება პრემიერლიგის ჩემპიონი, მას გაახსენდება „მანჩესტერ იუნაიტედთან” ჩატარებული ეს შეხვედრა და გული დაწყდება. შემადგენლობა, რომელიც იურგენ კლოპმა მოედანზე გაუშვა, შინაარსობრივად 0:0-ის გამკეთებელი იყო. მერსისაიდელები უკნიდან თამაშობდნენ და არ ეტყობოდთ, რომ მოგება უნდოდათ. ეს ჩემთვის დიდი სიურპრიზი გახლდათ. „ლივერპულს” „ოლდ ტრეფორდზე” ჩასვლის და მოგების შანსი ამ სეზონში ხომ მეტჯერ აღარ მიეცემა.
რასაკვირველია, შესაძლებელია პირიქით მოხდეს და „ლივერპულისთვის” მანჩესტერში აღებული ქულა სასიკეთო გამოდგეს, მაგრამ საკუთრივ თამაში უსახური იყო.
„მანჩესტერ იუნაიტედს” ამ ეტაპზე გამოუცდელი გუნდი ჰყავს, რასაც დაემატა ის, რომ მასპინძლებს პირველ ნახევარში სამი ფეხბურთელი დაუშავდათ, ეს კი ლივერპულელებისთვის დიდი საჩუქარი იყო, მაგრამ მათ საჩუქარი ვერ გამოიყენეს. არადა, ამ დღეს „მანჩესტერ სიტისთვის” მნიშვნელოვანი მესიჯის გაგზავნა შეეძლოთ.
მაგრამ, თამაშის შემდეგ „ლივერპულს” ეტყობოდა, რომ არ-წაგებით კმაყოფილი იყო.
ჩვენ ყოველთვის ვლაპარაკობთ მერსისაიდელთა ინტენსიურ თამაშზე, პრესინგზე, ზეწოლაზე, რომელსაც ისინი მეტოქეებს უწყობენ, გამუდმებული შეტევის წყურვილზე, მაგრამ ამჯერად მსგავსი არაფერი ყოფილა.
„მანჩესტერ იუნაიტედი” კი თავს შესანიშნავად იცავდა და მე თუ მკითხავთ, მატჩის საუკეთესო ფეხბურთელი ლუკ შოუ იყო. კრის სმოლინგი და ვიკტორ ლინდელოფი მო სალაჰს მეთვალყურეობდნენ და ერთხელაც კი არ მისცეს კარში დარტყმის საშუალება.
ლივერპულელი რობერტო ფირმინო ადრე დაშავდა, ხოლო მის არყოფნაში საიდო მანე მოედანს არ დასტყობია”.
