„მანჩესტერ იუნაიტედის” დროებითი მწვრთნელის ოლე გუნარ სულშერის აზრით პოლ პოგბამ თავი კრიტიკოსების სამიზნედ თავისი ცხოვრების წესის გამო აქცია.
ჟოზე მოურინიუს დროს, როდესაც ფრანგი მოედანზეც ვეღარ ბრწყინავდა, მისი ექსტრავაგანტური ცხოვრება ფანების, მიმომხილველების და თავად პორტუგალიელი მწვრთნელის დაუსრულებელი განხილვის საკითხი გახლდათ. ის წარამარა იცვლიდა ვარცხნილობას, ხმამაღალი განცხადებებით აქტიურობდა სოციალურ ქსელებში და ამ ყველაფერთან ერთად, როგორც უკვე ვთქვით, ვერც მოედანზე ყოჩაღობდა. შემდეგ კი „იუნაიტედის” სათავეში მოვიდა სულშერი და სურათი შეიცვალა — ოლდ ტრეფორდელი გულშემატკივრისთვის გასაგები გახდა როგორ და რატომ არის პოგბა მსოფლიოს ჩემპიონი.
დღეს, საქართველოს დროით 18 საათზე ფრანგს მორიგი გამოწვევა ელის: პრემიერლიგის ერთ-ერთ ლიდერს, „ლივერპულს” უნდა დაუპირისპირდეს. მერსისაიდელები მეორე ადგილზე არიან, მანკუნიანელები მეოთხეზე. მათ შორის სხვაობა 14 ქულაა, ხოლო სეზონის დამთავრებამდე 11 ტურია დარჩენილი.
და სანამ პოგბა „ლივერპულთან” თამაშისთვის ემზადება სულშერმა თქვა, რომ მას ნახევარმცველისთვის გიჟმაჟური ცხოვრების წესისთვის ხელის აღებისკენ ერთხელაც არ მოუწოდებია. სხვა საქმეა, რომ ნორვეგიელმა რამდენიმე დღის წინ (20 თებერვალს) პოგბა ბრიტანული სასიმღერო დაჯილდოებების ცერემონიალზე (Brit Awards) არ გაუშვა. სულშერისგან განსხვავებით „ლივერპულის” თავკაცმა იურგენ კლოპმა ამ ღონისძიებაზე თავისი მოთამაშეები, ალექს ოქსლეიდ-ჩემბერლენი და დენიელ სტარიჯი უპრობლემოდ გაუშვა.
„პოლი ყოველთვის გამორჩეული ფიგურა იყო, — თქვა სულშერმა, — მას შესანიშნავი ოჯახი ჰყავს, მაგრამ ექსტრავაგანტური ქცევა ათას ჭორს ბადებს. რაც შეეხება Brit Awards-ს, არასდროს უნდა გააკეთო ისეთი რამ, რის მერეც თავის გამართლება დაგჭირდება. სხვა საქმეა ახალი ვარცხნილობა, მანქანა და სხვა. ეს კი ბატონო, რამდენიც გინდა.
ვიცით, რომ „ლივერპულთან” შეხვედრის წინ ჩვენზე ამბობენ თითქოს კონცენტრაცია გვაკლია. ტყუილია. ყველა მოთამაშე ამ მატჩზე ფიქრობს, უბრალოდ პოლი პოლია, თუმცა ამ ბოლო დროს ქცევის მეტად გაკონტროლებაც დაიწყო. ისე, ვინ იცის, შეიძლება ექსტრავაგანტური ქცევისთვის ძალ-ღონეც აღარ რჩება. ყოველ შემთხვევაში, მე მასთან ამ თემაზე არ მილაპარაკია. მთავარია, რომ პოლი ვარჯიშებსა და გასახდელში გუნდის ლიდერია.
რაც შეეხება სოციალურ მედიას, მე ამ ბიჭებზე ცოტა უფროსი ვარ და მის ავან-ჩავანში მთლად ასე კარგად ვერ ვერკვევი. ამასწინათ, რეშფორდის მაისური გადავკიდე ჩემს ტელევიზორზე, ფოტო გადავუღე და დავპოსტე — ეკრანზე ის მომენტი ჩანს, რეშიმ 2018 წელს „ოლდ ტრეფორდზე” „ლივერპულის” კარში გოლი რომ შეაგდო. და ეს იყო სულ მეხუთე თუ მეექვსე „ტვიტი” ჩემს ცხოვრებაში”.
