ჩოჩქოლი იყო „ლივერპულისა” და „ბაიერნის” 0:0 დამთავრებული მატჩის შემდეგ — ბავარიელთა მწვრთნელი ნიკო კოვაჩი ლივერპულელთა თავკაცისთვის იურგენ კლოპისთვის ხელის ჩამორთმევას ლამობდა, ის კი რაღაცას უმტკიცებდა, ხელებს შლიდა, თითქოს გაურბოდა, თითქოს საყვედურობდა.
მომხდარს ნათელი მატჩისშემდგომ პრეს-კონფერენციაზე მოეფინა. კლოპმა, რომლის გუნდიც 13 მარტს მიუნხენში საპასუხო შეხვედრისთვის უნდა ჩავიდეს, თქვა:
„მე მინდოდა ნიკოსთვის ხელი თამაშის დამთავრებისთანავე ჩამომერთმია, ის კი წავიდა და ჯერ თავის ფეხბურთელებს დაუარა. როდესაც ბოლოს და ბოლოს დაბრუნდა, მე ვუთხარი, რომ ამდენ ხანს ველოდებოდი. შემდეგ მან ბოდიში მომიხადა და პრობლემაც აღმოიფხვრა. ეს იყო პირწმინდა გაუგებრობა. გერმანული გამოთქმა რომ მოვიშველიო, მთასთან ამოსული მუხასავით ვიდექი. ჩვენს ქვეყანაში ასე ამბობენ, როდესაც დაბნეულები არიან, გაუგებრობაში ხვდებიან”.
იგივე ეპიზოდი კოვაჩმა ასე განმარტა: „მწვრთნელები ერთმანეთს ხელს პირდაპირ საფინალო სასტვენის შემდეგ ინგლისში ართმევენ. ეს აქაური ტრადიციაა. გერმანიაში კი სხვანაირადაა და ეს მან ძალიან კარგად იცის. თამაში რომ დამთავრდა ჯერ ჩემებთან წავედი და არა მასთან. ცუდი განზრახვა არ მქონია, შემდეგ მივედი და მოვუბოდიშე”.
რაც შეეხება საკუთრივ თამაშს, „ლივერპულის” ჩვეულებრივ მწვავე თავდასხმა ამჯერად უფრო მშვიდი ჩანდა.
კლოპმა თქვა: „ასეთს არც შედეგს ვნატრობდი და არც თამაშს. სიხარულით მეცხრე ცაზე ნამდვილად არ ვარ, მაგრამ, მეორე მხრივ, რაც მოხდა სრულიად ნორმალური იყო. შესაძლო ფრეებს შორის ეს ფრე ყველაზე კარგი გახლდათ, თუმცა ფაქტია, უკეთაც შეგვეძლო გვეთამაშა. მეტიც, უნდა გვეთამაშა კიდეც უკეთ. მოკლედ, დიდი ბრძოლა გვქონდა.
პირველ ტაიმში ჩვენ მეტი საგოლე მომენტი შევქმენით, შესვენების შემდეგ კი ვერ ვიხსენებ რომელიმე გუნდს მეტოქის კართან ხიფათი რომ შეექმნას.
ამრიგად, ბრძოლა ჯერ არ დამთავრებულა. ჩვენ საპასუხო შეხვედრაში შეგვიძლია წარმატების მიღწევა. რასაკვირველია, დღეს ისე ვერ ვითამაშეთ მატჩი მაყურებელს 20 წელი რომ დაამახსოვრდეს, მაგრამ შემდეგ ეტაპზე გასვლის შანსი გვაქვს და ეს მნიშვნელოვანია.
„ბაიერნი” ალბათ ჩვენზე უკეთ გრძნობს თავს, თუმცა, ვიმეორებ 0:0 ჩვენთვისაც დამაკმაყოფილებელი ანგარიშია”.
