მუდამ მომღიმარი ნორვეგიელის სამწვრთნელო ზღაპარი გრძელდება. ოლე გუნარ სულშერის ხელში „მანჩესტერმა“ ზედიზედ მერვედ იმარჯვა, ამჯერად „ემირეითზე“ სათასო შეხვედრაში უნაი ემერის „არსენალთან“. სულშერი მიღწეულით დაკმაყოფილებას არ აპირებს. როგორც ნამატჩევს განაცხადა, სტუმრად არსენალთან კონტრშეტევაზე ყოველთვის ბევრი გაგვქონდა და მატჩამდე გუნდს რონალდუს, რუნის და ჩჟი-სუნ პარკის გოლების ნაკრები ვუჩვენეო.
ოლე მხოლოდ კლიპმეიკერობას არ დასჯერდა და ტაქტიკურად აშკარად დაჩაგრა ლონდონელი კოლეგა. პირველი მოულოდნელობა ლუკაკუს მარჯვენა ფლანგზე გამწესება იყო. არადა, ყველა ელოდა, რომ „მანჩესტერი“ მაღალი ბურთების დაკიდებას დაიწყებდა ცენტრში ლუკაკუსგან პოგბაზე ან სანჩესზე გადამისამართების მიზნით.
მძიმეწონიანი ფორვარდის ფლანგზე გადაწევამ ცენტრში სივრცე გამოათავისუფლა და პოგბას აღარ უხდებოდა დრიბლინგით დაცვითი ზღუდეების გარღვევა.
ლუკაკუ ხშირად შედიოდა ცენტრისკენ და სიტუაცია მყისვე მწვავდებოდა. ასეთ მანევრს მოჰყვა მისი დიდებული პასი და სანჩესის ზუსტი დარტყმა, მეორე საგოლე გადაცემა კი ლინგარდს შეუსრულა. ლუკაკუ სრულიად სამართლიანად აღიარეს შეხვედრის საუკეთესო მოთამაშედ.
მწვრთნელმა სულშერმა მეორე ტაიმში 4-4-2-ზე გადააწყო გუნდი და პრესინგის ხაზი მოედნის ცენტრამდე დახია, რამაც საჯარიმოს მისადგომები გაამყარებინა. მოედანზე რაშფორდისა და მარსიალის შეშვებით აქცენტი უფრო სწრაფ კონტრშეტევაზე გაკეთდა, ვიდრე პრესინგზე. შეხვედრის მიწურულს ყვითელბარათიანი ლინგარდი ჯონსმა შეცვალა, სულშერმა კი ერთხელაც, ამჯერად 4-5-1-ზე გადააწყო გუნდი და 3:1 გამარჯვებამდე მშვიდად მიიყვანა.
ვისღა მოუბრუნდება ენა იმის სათქმელად, რომ ნორვეგიელს ყისმათი აქვს და უმართლებს? გუშინდელი მატჩი ტაქტიკური განსწავლულობის მაგალითად გამოდგება.
„მშვენიერი შემადგენლობა გვყავს ფართო არჩევანით და სამწვრთნელო შტაბს სწორი შემადგენლობის და ტაქტიკის შერჩევაღა გვრჩება. ეიფორიის დრო არ გვაქვს, წინ ბევრი ურთულესი მატჩია,“ – განაცხადა ოლემ.
ინფორმაციისთვის: თავის დროზე „მანჩესტერში“ პირველი რვა გამარჯვების მოსაპოვებლად სერ ალექს ფერგიუსონს 19 მატჩი დასჭირდა.
