ლეგენდარული ალექს ფერგიუსონი „მანჩესტერ იუნაიტედის” ვარსკვლავებს შეხვდა და უთხრა: „თქვენს შეგიძლიათ ეს კლუბი კვლავ დიდ სიმაღლეებზე აიყვანოთ”.
შობის დღეებში სერ ალექსის ფეხბურთელებთან მიწვევა გუნდის დროებითი მწვრთნელის ოლე გუნარ სულშერის იდეა იყო. სულშერის ხელმძღვანელობით „იუნაიტედმა” ზედიზედ ხუთი თამაში მოიგო, ხოლო მავანმა ინფორმირებულმა ადამიანმა, რომელიც ფეხბურთელებისა და ფერგიუსონის შეხვედრას ესწრებოდა, ინგლისურ პრესას, კერძოდ კი „სანს” უამბო, კერძოდ რა თქვა ამ შეხვედრაზე „ოლდ ტრეფორდის” ლეგენდამ.
„სერ ალექსმა თქვა, რომ ფეხბურთელთა ამ ჯგუფს შეუძლია „მანჩესტერ იუნაიტედი” კვლავ დომინანტურ და წარმატებულ კლუბად აქციოს. მან მოთამაშეებს უთხრა, რომ სწამს მათი და სურს, რომ მათ თავიანთი ფეხბურთით ისიამოვნონ, ერთმანეთის დასახმარებლად თავგამოდებით იბრძოლონ და ყოველ შეხვედრაში მოედანზე გული და სული დატოვონ.
ფერგიმ მოთამაშეებს აგრეთვე უთხრა, რომ დღეს კლუბი საიმედო ხელშია, დაჰპირდა რომ „იუნაიტედი” ყოველწლიურად უფრო დიდ ძალას მოიკრებს და ისინი მომავლის ძლევამოსილი კლუბის ნაწილი, დიდი წარმატების მონაწილეები იქნებიან.
სერ ალექსმა ფეხბურთელები დაარწმუნა, რომ წინ დიდი გამარჯვებები ელით”, — თქვა მთხრობელმა.
„სანი” წერს, რომ გუნდის აღმასვლას, რომელიც სულშერის ხელში უკვე დაწყებულია, ფერგის გამოსვლამ დიდი მუხტი შესძინა. მოგეხსენებათ, მანჩესტერელთა ვეტერანი ფორვარდი გუნდს სათავეში ჟოზე მოურინიუს გაშვების შემდეგ ჩაუდგა.
77 წლის ლეგენდარული მწვრთნელი სულშერს დაჰპირდა, რომ ნებისმიერ დროს მზად არის დაეხმაროს რჩევით. სერ ალექსის გამოსვლამ ფეხბურთელებზე დიდი შთაბეჭდილება მოახდინა. წყარომ, რომელმაც შეხვედრის ამბები გამოიტანა, თქვა:
„ახლა ფეხბურთელებს უნდათ, რომ სერ ალექსს მისი სიტყვებისთვის მადლობა კარგი შედეგებით გადაუხადონ. ისინი მზად არიან მისთვის და სულშერისთვის მოედანზე თავი დადონ”.
შაბათს „მანჩესტერ იუნაიტედმა” ფეხბურთის ასოციაციის მესამე რაუნდის შეხვედრაში „რედინგს” 2:0 მოუგო, რაც სულშერის ხელმძღვანელობით გუნდის ზედიზედ მეხუთე გამარჯვება გახლდათ — ამრიგად, ნორვეგიელმა სერ მეტ ბასბის რეკორდი გაიმეორა.
კვირას „იუნაიტედი” „ტოტენჰემ ჰოთსპურს” უნდა შეხვდეს და ამ მატჩის წინ გუნდი დუბაიში ატარებს რამდენიმედღიან შეკრებას. სულშერი ამბობს, რომ „სფურზთან” თამაში მას უფრო ზუსტად დაანახებს, „კარდიფის”, „ჰადერსფილდის”, „ბორნმუთის”, „ნიუკასლისა” და „რედინგის” დამარცხების შემდეგ კონკრეტულად რა დონეზეა მისი გუნდი.
