პეპ გვარდიოლა ამბობს, რომ „ლივერპული” ცხრილში უპირატესობის შემნარჩუნებელი არ არის. მოგეხსენებათ, სადღეისოდ პრემიერლიგას მერსისაიდელები ლიდერობენ. ისინი მოქმედ ჩემპიონ „მანჩესტერ სიტის” 7 ქულით უსწრებენ და ხვალ „ეტიჰედზე” ხვდებიან. უფრო სწორად, საქართველოსთვის ეს შეხვედრა ზეგ გაიმართება, რადგან ის ჩვენი დროით შუაღამისას იწყება.
„ლივერპული” 1990 წლის შემდეგ არ ყოფილა ინგლისის ჩემპიონი.
„სიტის” მწვრთნელმა გვარდიოლამ თავის ფეხბურთელებს უთხრა, რომ მას თავისი გუნდის კლასისა სწამს და ეჭვი არ ეპარება, რომ სწორედ კლასის წყალობით შეძლებენ „წითლების” უპირატესობის გადაძალვას. კატალონიელს მოსწონს, როგორ შეძლო „ლივერპულმა” ის, რომ დღემდე არ დამარცხებულა, მაგრამ ამასთან დარწმუნებულია, რომ იურგენ კლოპის გუნდი მაისამდე ლიდერობას ვერ შეინარჩუნებს.
ინგლისური პრესის თანახმად გვარდიოლას აფიქრებს ის შეცდომები, რომლებიც ბოლო შეხვედრებში მსაჯებმა მერსისაიდელთა სასარგებლოდ დაუშვეს. კერძოდ, ლაპარაკია ორ არცთუ აშკარა პენალტზე, რომელიც „წითლების” თავდამსხმელმა მოჰამედ სალაჰმა შობის დღეებში მოინადირა და ეპიზოდზე, როდესაც არბიტრმა დეიან ლოვერნის სასარგებლოდ განსაჯა.
გვარდიოლა შიშობს, რომ თუკი მსაჯები საკვანძო მომენტებში ხვალაც „ლივერპულის” სასარგებლოდ შეცდებიან, მაშინ „სიტის” საჩემპიონო ამბიციებს შეიძლება სერიოზული ჩრდილი მიადგეს.
ამასობაში „მანჩესტერ სიტის” სერხიო აგუერო დაუბრუნდა და „ქალაქელების” გულშემატკივრებს იმედი გაუძლიერდათ. მიუხედავად იმისა, რომ ჯერ იანვარია, არგენტინელი ფორვარდი მიიჩნევს, რომ ხვალინდელ შეხვედრას ძალიან დიდი მნიშვნელობა აქვს.
„ლივერპულელები როგორც გუნდი იზრდებიან და ამის შემჩნევა უკვე რამდენიმე წელიწადია შეიძლება. მათი გაძლიერება თვალსაჩინოდ იყო ჩემპიონთა ლიგაში, მაგრამ ჩვენ საკუთარ ფეხბურთზე უნდა მოვახდინოთ კონცენტრაცია. მეტოქეზე ფიქრი სიკეთეს არ მოგვიტანს. ჩვენ თამაშის ჩვენებური სტილისა გვწამს და გვჯერა, რომ ის გამარჯვებას მოგვიტანს.
იმის უარყოფა, რომ 3 იანვრის მატჩი ორივე გუნდისთვის პრინციპულად მნიშვნელოვანია, შეუძლებელია. ლიდერების უშუალო დაპირისპირებებს სეზონის განმავლობაში უდიდესი მნიშვნელობა აქვს. დეკემბერში ჩვენი საქმეები ისე ვერ წავიდა, როგორც გვინდოდა, რაც გამოსასწორებელია და ამიტომ „ლივერპულთან” შეხვედრა ერთიორად მნიშვნელოვანი ხდება. მეორე მხრივ კი ჯერ მხოლოდ იანვარია და წინ უამრავი შეხვედრა გველის. პლუს, ტიტულისთვის მარტო ჩვენ და „ლივერპული” კი არ ვიბრძვით, კიდევ რამდენიმე კონკურენტი გვყავს. ვფიქრობ, ჩემპიონატში დაძაბულობა კიდევ დიდხანს გაგრძელდება”, — თქვა აგუერომ.
